Congress-i Kiren Rijiju mapa nungi anentsütsü akhanger; Rijiju-i pa dak tai tongloktsürtem merenshitsü amokmeren

New Delhi, December 13 (Agencies) : Mongulbarnü Congress-i Union Minister of State for Home Affairs, Kiren Rijiju mapa nungi anentsüla ta takhangba agütsüogo.
Arunachal Pradesh nung sen crore 450 jenjang Hydro-electric power project inyakdang tim mesüi inyakba onük ka nung Rijijju daka tai tonglokja Congress-i pa mapa nungi anentsü takhangba agütsür.
Tanü New Delhi nung osangbener senden ka nung Congress otongdar, Randeep Surjewala-i, “‘Rijiju’er kinunger ka Arunachal Pradesh nung contractor lir aser pai iba ochimashi mapa nung shilem agi aser minister (Rijiju)-i pa yari” ta ashi.
“Kiren Rijiju’er kinunger aitsütsü atema onok ket nung audio kuli lir” ta Randeep-isa ashi.
2014 General Elections nung Prime Minister Narendra Mod-i ochimashi meinyaktsü aser tangar nema meinyakdaktsütsü ta jembiaka, pai ochimashir anema meinyakba atema Congress-i pa aitsü.
“Kameng Hydro Electric project nung MoS Rijiju-i tashishitsü aketba mapa aika inyak aser par kinunger indang olaji minute 28 audio tape nung menüngoka lir” ta Congress otongdarisa metetdaktsü.
“Pa Union Cabinet nung minister ka ama inyaktsü temeten mali. Iba ken o bushisüngdang metembang tashi pai mapa nungi anena atatsüla, kechiyong hydro power project nung agüja aliba kuli aika taila asütsü” ta Surjewala-isa shisem.
PM Narendra Modi-i Kameng Hydro Electric project ‘ochimashi’ ken o atema sangdong ka agütsütsüla, ta paisa takhangba agütsü.
Ajisüaka, Rijiju-ibo pa dak tai tongloktsüba ken o ji tiyazü aser kuli mali ta metetdaktsü.
North Eastern Electric Power Corporation (NEEPCO) nung ochimashi inyakba ken o atema vigilance report ka nung pa tenüng tetshia lir aser pa dak tai tongloktsüba nisungtem Arunachal Pradesh-i aru nungbo tsüngsem agi züka merenshitsü, ta tanü Rijiju-i ashi.
Arunachal Pradesh nung contractor aser Rijiju’er kinunger Goboi Rijiju, NEEPCO nung Chairman aser Managing Director dena tongti ketdangser aika PSU indang Chief Vigilance Officer-i agütsüba sangdong ka nung tai tonglokja lir. Arunachal Pradesh nung hydro-electric project tulutiba rongnung ka, 600 MW Kameng Hydro Electric Project nung tzünokdang ana yangluba nung ochimashi mapa inyakba atema parnok dak tai tongloktsür, ta osang ajanga ashi.
Iba dak sendakba nung Rijiju-i Ministry of Power dangi züluba shidi ka nung, contractor aser par kinunger Goboi Rijiju nem fund agütsütsü shia lir aser iba shidiji pai zülu ta Rijiju-ia kuli süogo.
Ajisüaka, Rijiju-i “nisung yaritsü merangba mapaji ochimashi mapa asü?” ta meyiper asüngdanga liasü.
Iba osang temai adokba sülen NEEPCO nung Chief Vigilance Officer, Satish Verma inyaka aliba Tripura nung CRPF nung inyaktsü atema aniena liasü. Satish Verma ya Gujarat IPS officer ka lir.
Taküm July ita Verma-i agütsüba report ji CBI, CVC aser Ministry of Power dangi yokba nung, Contractor tem, NEEPCO ketdangsertem aser West Kameng district administration nungeri NEEPCO aser sorkar külakoktsütsü atema tasa atong aser iba ya sen crore 450 shi alangba mapa liasü, ta shia lir.
West Kameng ya project inyakba tesem lir aser iba iba tesem ya Kiren Rijiju indang parliamentary constituency lir.