Jorhat, February 7 (Agencies) : Assam nung assembly election agitsü lia Congress-i merla sü aser komboltem agüja nübo ayimtsü meranger ta Assam nung kaketshir teetet ka- Asom Jatiyatabadi Yuba Chatra Parishad (AJYCP)-i aitsüogo.
AJYCP nung Tinsukia unit president-i sorkar anema mapa inyaker ta aija Honibarnü police-i pua lir.
Tanü AJYCP-i sangdong ka nung ashiba agi, tesüiba anogo ishika tsüngda state sorkari chief minister Tarun Gogoi’er assembly constituency Titabor aser par district Jorhat-i kombol 17,000 aser merla sü 90,000 bener yokogo.
Jorhat Deputy commissioner, Solanki Vishal Basant-ia sorkari Jorhat aser Titabor asoshi kombol aser merla sü bener yokogo ta metetdaktsü .
“Taoba hopta Department of Handloom and Textiles-i Titabor aser Jorhat nung alirtem asoshi itemji bener yok. Ano district atema maneni kombol aser merla sü tem agütsütsü. Sorkari itemji lema agütsütsü tetuyuba agütsüba dang onoki atar” ta paisa ashi.
Ajisüaka, AJYCP Organizing secretary, Siva Kalita-i iba inyakyim aitsüogo aser sorkari yimten mapa inyaker ta ashi.
“Jorhat asoshi kombol aser merla sü 8,000 den timba aser ano Titabor asoshi kombol 9,000 aser merla sü 80,000 bener yok. Asükwa joko tesütemer, anungji tang kombol nüngdak mali” ta Kalita-isa metetdaktsü.
You must be logged in to post a comment Login