Congress-i lanur lennirtem ajanga temelenshi bener arutsü: K Therie

Kohima, May 22 (TYO): Naga nungeri sorkar ketdangsübaren nung temelenshi aginür aser iba temelenshiji Congress-i bener arutsü renema lir, ta Nagaland Pradesh Congress Committee (NPCC) tir Kewekhape Therie-i ashi.
Sangküm küm tetenzüklen agitsü aliba state general election nung Congress-i lanurtem shilem agidaktsütsü aser lanur candidate tem shimtsü aser ibaji ajanga temelenshi adoktsü, ta pai ashi.
Naga nungeri State Assembly nung tang aliba züngsemtem laktetogo. Parnok (MLA tem) tenarong jakogo aser temeli tatsük kümogo, kechiyong tesüiba Assembly menyonga arudang, parnoki nübortem asoshi onük kecha benoka mejembi, ta Therie-isa ashi.
Naga nungeri narongjaker aser temeli tatsük yimten yimsüsürtem menüngdaker aser tang teinyakdak MLA tem ya tanaben shimra, parnok maneni shirong-sa asütsü aser sorkar ketdangsübaren kasa dang asütsü, ta paisa metetdaktsü.
Linük nung yimsüsür tajungtibatem akümtsüsa asen Naga lanurtem lir. Taruba election nung lanurtemi Congress nung adentsü aser temelenshi atema inyaktsü imlar, ta NPCC Tir-isa shisem.
Paisa ashiba agi, Congress lenisüba nung tazüng tuluka lir, kechiyong 2013 elections nung Congress ticket nung adokertem NPF nung denogo. Anungji, lanurtemi iba maongka agia, temelenshi bener arutsü atema shilem agitsüla.
All India Congress Committee (AICC)-i sorkar aser party jenjang nung tashi decentralize asütsü lemtetogo. Teküpokba jenjang nung party züngsemtemi yimten yimsüsübaren nung shilem agitsü atema iba telemtetba ya agiogo, ta Therie-isa shisem.
AICC aser PCC-i inyaka aotsü sentongtem, tangatetba mesüra teinyaktsütem shisadanga yanglutsü aser training o workshops ayonga agitsü. Ajisüaka, NPCC mesüra AICC ajanga candidate meshimtsü. 2018 elections atema candidate tem shimtsü maparenji Assembly Constituency Congress Committee (ACCC) nem tashi agütsüogo.
Osangbenertemi Nagaland nung tawa tasen tentetba yimtenren telok- Democratic Progressive Party (DPP) indang asüngdangdang, Therie-i “iba telok tentetba ajanga Naga People’s Front (NPF) lemsatsü kechiyong NPP nung züngsemtemji NPF nungi aoertem lir” ta langzü.
Nagaland state nung BJP aser RSS anema raratsü atema dang masü saka jenjang ajak nung terenlok bener arutsü atema Congress ama secular party ka nüngdak. Tamangba yimsü nüjiso agütsüba secular party ji Congress dang lir aser Congress-i Naga nunger maitsü kümzüka yutettsü, ta K Therie-isa metetdaktsü.
2018 election nung Congress-i takok angutsü. NPF-i küm 15 tashi sorkar ketdangsüa arudang nübortemi parnok maginür, külen BJP anema nokdaker. Anungji, taruiba election nung secular force nem vote agütsütsü aser Nagaland nung secular force ji Congress dang lir. NPF dena tanüngba teloktemji RSS aser BJP indang yimtenren tashikang lir, ta paisa ashi.
DPP tentetba ajanga NPF nung telemsa adoktsü. NPF, BJP aser DPP tsüngda vote lemsaba ajanga Congress-i takok tulu angutsü, ta paisa shisem.