Congress-i Manipur aser Meghalaya nung sorkar akümtsü akhanger

Shillong, Monupii (May) 18 (Agencies): Manipur nung opposition Congress lennirtemi Hokolbarnü Governor J. Mukhi den ajuruteper sorkar akümtsü atema takhangba agütsü.
Tang ya Manipur Governor Najma Heptulla sodi nung lir aser la melena Assam Governor Mukhi-i Governor repsema bena lir.
Raj Bhavan nungi aluba sülen opposition lennir aser taoba Chief Minister Okram Ibobi Singh-i ashiba agi, “Manipur nung BJP-i aniba teloktep sorkar anendaktsütsü atema onoki takhangba agütsü kechiyong March 2017 Assembly election nung Congress-i menden 28 nung takok angu. Onoki menden teimba nung takok angu saka onok nem sorkar akümtsü tashi magütsü.”
“Onok nem sorkar akümtsü maongka agütsüra, onoki anogo ishika tsüngda nübo teimba sayutsü” ta Ibobi-i ashi. Ajisüaka, Governor Mukhi-i Congress ajanga agütsüba memorandum pai khen jungjunga reprangdangtsü.
Yaküm assembly election nung BJP-i menden 21 nung takok angu saka parnok nem sorkar akümtsü atema maongka mezüng agütsü. Parnoki tanga party tem den loktep.
Osangbertemi Manipur Chief Minister N. Biren Singh dang Karnataka nung atalokba atema paia kechi bilemer ta asüngdang saka “Iba ya constitutional onük ka lir aser ni iba atema kechi meshitettsü” ta langzü.
Ibobi-isa ashiba agi, parnoki Honibar nikongdang 4:00 ako tashi atatsü aser iba sülen taruba mera agitsü.
Taküm February ita Meghalaya assembly election nung Congress-i menden teimba angu saka parnok sorkar akümtsü atema mejaok.
Iba atema Hokolbarnü state ajungalen lungkak aitba sentongtem agi aser India Tir Ram Nath Kovind dangi temepishiba shidi ka zülu.
Meghalaya nung Congress-i Kovind dang democratic tangatetba aser Linük Temzüng kümzüka ayutsü atema ayongzük.
Congress-i tesem balala nung lungkak aitba sentongtem ayonga agi aser Raj Bhawan nung Ramnath Kovind dangi shidi agütsü. Yang ya Governor Ganga Prasad Shillong nung mali.
“Karnataka governor-i tejak repranga aser tashiyim mapa inyakba atema jashir ta sayua Meghalaya Pradesh Congress Committee-i lungkak aitba sentongtem agir” ta MPPC tir Celestine Lyngdoh-i ashi.
Congress Bhavan kima nunga Congress president aser MLA Ampareen Lyngdoh aser Congress legislature party secretary Hima Shangpliang nati lungkak aitba sentong ayonga agi.