Congress-i Mizoram nung BJP nem telangzüba agütsütsü

Aizawl, Mongputeni (October) 10 (Agencies): Mizoram nung Indian politics melenshitsü kechiyong BJP-i lokti nung telemsa adokdaktsüba, sobaliba bendangba aser tamangertem reshikangshiba Congress-i anendaktsütsü ta AICC general secretary & northeast in charge Luizinho Faleiro-i ashi.
“Indian National Congress-i sorkar yimsü asüba Mizoram state nung Indian politics melenshitsü, onoki BJP-i inyakba mapatem meyipshidaktsütsü” ta Bodbarnü Aizawl nung Faleiro-i ashi.
Aizawl Press Club nung osangbener den jembidang taoba Goa chief minister Luizinho Faleiro-i ashiba agi NDA sorkari mapa ajak nung tamakok anguba ajanga linüki mapang tamajung ka ajurua lir.
“Centre nung mesüngjemtetba tensa ka ajurua lir. Linük indang rongsenkettsüng kanga mejungi kümogo, rupee jenjang tajemba akümer, petroleum products jenjang tupet atu, mapa mangur aser aluyimertem kanga soseta asür. Linüki ajakji nguogo aser Mizoram election ajanga ibaji melenshitsü” ta Faleiro-i metetdaktsü.
November 28 Mizoram aseembly election maparen reprangshimtsü atema AICC general secretary Faleiro tang Mizoram nung mungzüka lir aser paisa ashiba agi, “Narendra Modi’er asalentong ajak nung tamakok angur. Pai demonetization mapa inyakba ajanga ozüng alema sen kecha bener marutet saka linük indang sen ang auya.”
“Modi tenu nungertemi asen bank tem auyar bendang linüktemi jena ao. Iba ama rongsenkettsüng tsütsü khuret mapang ka nung bank aika shibangtsü” ta paisa shisem.
Tang agitsü aliba assembly election ya Gujarat nung tesempatep adokdakja inyakba den Mizoram nung yimjung, azükaru aser tejakleni aoba tsüngda tokteptsü. Modi-i tesempatep adokdaktsüba, sobaliba lemsaba maparen Congress-i anendaktsütsü. BJP-i tamangba yimsü ka sülen anidang ta ashiba onoki anendaktsütsü. Parnoki nenok dang kechi sübotsü aser kechi achitsü ta tetuyuba agütsüba onoki anendaktsütsü, ta Faleiro-isa metetdaktsü.
“Zoramthanga-i aniba MNF party ya northeast nung BJP-i aniba NEDA nung dena lir. MNF president Zoramthanga ya NEDA tenzüker rongnung ka lir. NEDA ya Amit Shah-i apiteta tentetba yimten sabang lir, iba sabang nung tamangba tsütsü taremzük mali. NEDA ya Mizoram atema masü. Meghalaya, Nagaland aser Manipur nung ama MNF ajanga BJP nem remote control tesüdaktsü” ta paisa ashi.

You must be logged in to post a comment Login