Congress-i Mizoram nung takok tulu angutsü imlar

Aizawl, Mongputeni (October) 23 (Agencies): Mizoram nung Congress-i takok tulu angutsü aser “single largest party” asütsü. Northeast nung maneni Congress-i Mizoram nung sorkar akümtsü, ta Mizoram atema AICC Secretary in charge, Ampareen Lyngdoh-i ashi.
“Mizoram Assembly elections nung Congress-i takok angutsü” ta Ampareen-i ashi.
Mizoram nung yimten mapaji Congress aser MNF tsüngda tokteper aser onoki maneni sorkar akümtsü tashi angutsü, ta laisa shisem.
Aizawl jila nung MNF pusema aika lir saka Mizoram ajungalen Congress pusemer teimba lir, ta AICC lennirisa metetdaktsü.
Congress-i lanurtem shilem agidaktsütsü sentong atongogo aser iba ya tang Congress-i linük nung inyakba mapa ka lir. Iba ya lennir tejentem akhüm metsüburba masü saka tejak tasentem aniokerba lir, ta Ampareen-isa shisem.
“Tashi tasen anioktsü mapang ka lir aser parnok jungjunga anitetba ajanga party saksalemtsü” ta laisa ashi.
“Onoki lanur lennir aika candidate asütsü shimogo, saka menden kar nungbo lennir tejentem toktepdaktsür” ta laisa ashi.
November 28 nü agitsü aliba Mizoram Assembly election atema Congress-i candidate 36 shimba osang metetdaktsüogo.
Chakma tesemtem nung tensa angatettsü kanga tasak lir aser iba tesem nungi candidate meshim yonga tanga candidate tem peria dang lir, ta Chakma tesemtem atema Ampareen-i olen ka ashi.
Mizoram nung parnok amentettsü atema BJP-i menden 40 prongla nung tokteptsü lemtetogo.
BJP National president, Amit Shah-i tawa state semdangdang, Mizoram nung taruba Christmas ji BJP-i aniba sorkar kübok amungtsü, ta metetdakja liasü.
Tang Mizoram assembly nung Congress MLA asem anenba sülen MLA 37 anünga lir. Parnok rongnung Congress nungi 31 aser Mizo National Front nungi 6 lir.