Congress-i Modi’er sorkar tamakok indang kaket ka sayaogo

New Delhi, May 28 (Agencies): Narendra Modi’er sorkar küm ana ajungba benjungmung  sentong balala ayongzüka sorkari inyaktetbatem sangdongba mapang ka nung Honibarnü Congress lenir aser taoba mapang Union Finance Minister, P Chidambaram-i ‘Two Years of Failed Promises & Lies of Modi Govt’ ta ser kaket tila ka sayaogo. Iba kaket nung sorkar osang tejangja agüja lir.
Indian National Congress indang twitter account nung, “Sorkar küm ana ajungba atema BJP benjungtepdar. Ni BJP ta ashir, kechiyong sorkar nung parnok den teloktep, Shiv Sena-ibo iba benjung nung madener. Atangji, Shiv Sena-i sorkar aija arur. Tongtibangsa, nüburtemi iba benjung nung madener,” ta shia lir.
Delhi nung osangbenertem den jembidang Chidambaram-i, “Nüburtem tejak mesangwateti alibaji kechiba, iba atemaji kuli tajung ka lir. Iba ya rongsenkettsüng ajanga lir,” ta ashi.
Tawa linük nung aliba University campus tem nung kaketshirtem longkak aitba dak sentakba nung pai, “University tem nung longkak aitbaji, university graduate temi tarutsü teimla manguba ajanga-a asütsüa akok. School shisaliok küm 8-10 nung tembangtsüpur lanur million aika lir. Parnok atema mapa kong ali (?)” ta asüngdang.
Modi sorkar atema tamakok tongti kaji mapa madokdaktsüba lir,” ta pai ashi.
‘Make in India’ mapatong aija Congress lenirisa, “Make in India ya takok angutsüsa masü. Study ajanga FDI (Foreign Direct Investment) ji manufacture dangi masü saka services sector dangi aiter. 2016 küm project 893 bo anentsüogo ta sangdongogo. Tesüiba küm ana nung project 1,137 bo anentsüba, atsülangba mesüra sentokba category nung liasü,” ta ashi.
Taoba mapang Union minister-isa, “GDP number nung pelatsü tera dang lir. GDP number aser tanga indicator tem na tsüngda tepila maneni adoker. Tejen inyakyim kübok ongko inyakdangra number ji 7.6% masü 5% asütsü,” ta ashi.
“Sensotemi sen aazüka taküm alitsü atema GDP number masü saka mapa nüngdaker,” ta Congress lenirisa shisem.