Congress-i Naga yimten latettsü atema yariteptsü: Rahul Gandhi

April 3, 2019 nü DDSC Stadium, Dimapur nung Congress president, Rahul Gandhi pelaa agizükdang tangokba noksa ka angur.

Dimapur, April 3 (TYO): Centre nung Congress-i taruba sorkar kümra Indo-Naga yimten ken o latettsü ta Congress president, Rahul Gandhi-i tanü nangzük.
Nagaland nungi Lok Sabha candidate, K L Chishi atema nüboyimtsüba sentong ka Dimapur nung ayongzüka agidang “Naga yimten tebilemtsü ya bentettsü kanga tasak kechiyong iba nung aika sendaktepa lir. Ajisüaka, ajak den jembitepa iba atema tekaratiba nung telemtetba ka agitsü onoki merangtsü” ta Rahul-i ashi.
“Ni tiyazü tenangzükbatem magitsü mesüra o tazüngla mejembitsü, saka Indo-Naga yimten ken o ya sendaktepa alir ajak den jembitepa latettsü merangtsü” ta paisa shisem.
“Tanü NDA sorkari linük nung tebilemba ka aser tangatetba ka dang lidaktsütsü meranger. Ajisüaka, Congress-ibo state shia indang sobaliba, putiotsü aser tebilemba balala lir ta amanger. Asenok dang libalirotsü atema tetuyuba agütsütsü atema parnokji dak tashi mali mesüra shingaia temelaba agüja mali. Sobaliba raksatsütsü merangba mapa anema Congress-i noktaktsü,” ta Rahul-isa metetdaktsü.
Northeast ya balaka ta ajitetba aser agizükba agi UPA sorkari NE state tem nem special status category lemzüktsü. Ajisüaka, NDA sorkari ibaji agien. Centre nung sorkar kümra Congress-i tanaben NE state tem nem special status category aser tanga special provisions agütsütsü, ta paisa nangzük.
Dr. Manmohan Singh-i Look East Policy indang jembi aser iba atema tenüngsang agütsür. North east ajanga India aser Asia linüktem sendakteptsü tashi lir anungji Congress-i iba policy mapa küma inyaktsü aser rongsenkettsüng tsütsü renlokdaktsütsü atema merangtsü ta Rahul-isa nangzük.
Congress-i kodanga Citizenship Amendment Bill (CAB) magizükdaktsütsü, ta paisa nenshia metetdaktsü.
Iba sentong nung Nagaland nung Leader of Opposition NPF MLA TR Zeliang aden aser pai ashiba agi “Naga nunger temeten anema inyakba aser telemsa adokdaktsür indang candidate nem tamakok ngudaktsütsü atema NPF-i Lok Sabha election nung candidate shinga meshimi Congress candidate ang posema yaritsü telemtetba agi.”
Centre nung Congress-i sorkar kümra Naga yimten tebilemtsü atema temulung agüja inyaktsü ta amanger, ta TR Zeliang-isa shisem.
Nagaland Congress president, K Therie-ia o jembidang Rahul dang Naga yimten tebilemtsü tatem küma jembitsü atema inyakang ta ayongzük.
“Nagaland nung alirtemi BJP ketdangsübaren nung tamang samaogo. Tang mezüng atema Nagaland NPF aser Congress külemi longjemer secular force tashi itdaktsür. NPF-i Congress candidate KL Chishi yaritsü lemtetba atema parnok dak kanga pelar” ta K Therie-isa ashi.
Tanü agiba sentong nung Rajya Sabha, MP, K G Kenye-ia o jembi.