Congress-i Nagaland nung PR alitsü aser election agitsü akhanger

Kohima, February 6 (TYO) : NPF-i aniba DAN sorkari tamakok nguogo anungji state nung President’s Rule (PR) alitsüla, ta Nagaland nung Congress Party-i tanü takhangba agütsüogo.
Hombar anüngdang Congress Bhavan, Kohima nung Nagaland Pradesh Congress Committee (NPCC) ketdangpurtem senden ka amendang Nagaland nung PR alitsü takhangba agütsütsü telemtetba agi, ta State Congress President, Kewekhape Therie-i osangbener dang ashi.
Nagaland state nung Urban Local Bodies (ULB) indang elections agitsü atema mangatettep adoka tensa mejungi akümba onüktem lemsateptsü atema tanü NPCC sendenji ayonga amen.
“NPF-i aniba DAN sorkari nübortem taginüba mangatet aser sorkar ketdangsüba nung tamakok nguogo. Sorkar department teimbaka shibangtsüogo aser sorkar indang gari ka danga mesenzüteter” na NPCC President-isa ashi.
January 12, 2017 nü NPCC-i iba onük atema shisadangba sülen state sorkar dang tamasa kin teloktem den jembitepa ajaki mulunga telemtetba ka agiba sülen ang ULB elections agitsü atema thinena atang ta tayongzükba agütsü, saka sorkari ibaji magizük. Ajisüaka, ano February 2 nungbo state sorkari ULB elections agientsü telemtetba agi aser iba jagi sorkari tamakok anguba aser ketdangsüa moutetba kuli agütsür, ta paisa shisem.
“Nübortemi shimtetba sorkar kati nübortem taginüba ama meinyakra aser nübortem asoshi mebilemtsüra, iba sorkarji yimsü asütsü temeten mali. Nübortemi parnok dak tamang samaogo aser sorkari Nagaland nung aliba nübor madak yimsü asütsü temeten mali. Anungji, tang tensa sünemtsü asoshi President’s Rule alitsüla aser election jazüka agitsüla” ta Therie-isa osangbener dang ashi.
Honibarnü State Cabinet-i Prime Minister dang Linük Temzüng nung Part IXA nung Nagaland medendaktsütsü atema asüngdangtsü telemtetba agiba atema NPCC President-isa ashiba agi, “iba inyakyim ajanga Nagaland nung alirtem asoshi maaksü bener arutsütsü kechiyong Nagaland Municipal Act ya State Assembly indang Act ka lir.”