Congress-i NE merenlokdaktsü: Shivraj Chouhan

Agartala, August 2 (Agencies): Northeast tejakleni maoba ya Congress aser UPA ajanga lir ta taoba Madhya Pradesh chief minister aser BJP Vice President Shivraj Singh Chouhan-i ashi.
Agartala nung aliba BJP headquarters nung osangbener den sensaksemdang Chouhan-i iba len jembi.
BJP indang membership drive mapa reprangdangtsü atema pai anogo ananü atema Triprua semdang.
“Rahul Gandhi aser Manmohan Singh’er party Northeast dak temulung magütsü aser iba tesem tejakleni maoba atema parnoki tebilemtsü abentsü” ta Chouhan-i ashi.
“Congress-i aniba UPA Northeast nem temeten magütsü aser NE o Tripura merenlokba ya parnok ajanga lir” ta pai aitsü.
Vajpayee lenisüba kübok BJP-i aniba NDA sorkari Northeast atema special packages agütsü aser lisopurtem atema ministry balaka tentettsü, ta paisa ashi.
Northeast renlokdaktsütsüba ya BJP indang tongti teinyaktsü liasü, ta Shivraj Chouhan-isa metetdaktsü.
Atal Bihari Vajpayee’er sorkar kübok aser tang Narendra Modi’er sorkar kübok Northeast atema sentong aika atonga inyaker, ta paisa shisem.
Congress-i aniba UPA sorkari küm 10 tashi yimsü asüdang Northeast nung terenlok mapa kecha meinyak, ta Chouhan-isa ashi.