Congress-i North East Coordination Committee tentetshiogo

New Delhi, November 05 (Agencies): Tanü Honibarnü Congress-i North East Coordination Committee tanaben tentetshiogo, aser iba luden nung tekolakji Meghalaya Chief Minister, Mukul Sangma asütsü.
New Delhi nung osangbenertem den jembidang Congress lenir, Manish Tewari-i, “Congress Tir aser tatong Tir nati North East Coordination Committee tanaben tentetshiogo,” ta metetdaktsü.
“Committee tasen ka tentetogo aser iba ludenji Meghalaya Chief Minister Mukul Sangma-i anitsü,” ta Tewari-isa metetdaktsü.
Iba committee nung taoba mapangArunachal Pradesh Chief Minister Nabam Tuki aser Manipur Chief Minister Okram Ibobi Singh nata dena lir.
Coordination Committee tentetba sülen Sangma-i, “India nung tebenja aika lir. Yangji (northeast) aliba onük balala atema inyaktsü asoshi meteta aliba lenirtem alitsüji kanga tongtibang,” ta ashi.
“Northeast India nung temelenshi tulu adokdaktsütsüsa Congress lenirtem dak alaka tanga party nungi mali,” ta Sangma-i ashi.
Sangma-isa, Congress lenirtemi north east onüktem reprangtsü, lenirtem sabang kati anir arutsü aser tesem kümzüka ayutsü, ta metetdaktsü.
“Onoki nüburtem tenzüktsü, kechiyong ozü nükjidongtemji nüburtemi aginüba onüktem den kasa lir,” ta Meghalaya Chief Minister-isa ashi.
“Tang aliba sorkar nung onük aika lir, aser item rongnung Finance Commission nung aliba ama state tem nem senotsü magütsüba dena lir,” ta taoba Arunachal Pradesh Chief Minister, Nabam Tuki-ia ashi.