Congress-i Northeast Coordination Committee akangshitsü

New Delhi, September 13 (Agencies): Northeast nungi Congress lennirtem den senden amenba sülen All India Congress Committee (AICC)-i Northeast Coordination Committee akangshitsü telemtetba agiogo.
Congress interim president Sonia Gandhi aser Northeast nungi taoba chief minister tem dena Congress lennirtem senden amendang iba telemtetba agi.
“NE state temi ajuruba khuret kar onoki lemsatep. Northeast nungi lennirte tejentemi parnok tebilembatem lemsatepogo. Onoki Northeast coordination committee akangshitsü lemtet aser Guwahati nung teti atema office ka lapoktsü telemtetba agiogo” ta Northeast state tem atema Congress secretary in-charge Luizinho Faleiro-i metetdaktsü.
Senden nung taoba Prime Minister Manmohan Singh aser Congress lennir tejen Ahmed Patel na aden.
“Onoki mapang shia ajuruteptsü aser northeast state tem indang khurettem atema olemteptsü telemtetba agiogo. Northeast nung alirtemi khuret teimba ajurua arudar aser iba ya anendaktsütsüla” ta Faleiro-isa ashi.