Congress-i Northeast sobaliba nung teka maitsü: Rahul Gandhi

Imphal nung Congress President Rahul Gandhi-i Manipur State Film Development Society Auditorium nung sentong ka adendang agiba noksa angur.

Imphal/Agartala, March 20 (Agencies): Centre nung sorkar kümra Congress-i Northeast industrial policy tenzüktsü aser Manipur den tanga Northeast state tem nem special category status agütsüshitsü, ta AICC president Rahul Gandhi-i ashi.
Congress-i Citizenship (Amendment) Bill ozüng mekümdaktsütsü ta Rahul-isa nenshia metetdaktsü.
Imphal East district nung aliba Hapta Kangjeibung ground nung lokti sentong ka nung jembidang “Manipur aser tanga Northeast state tem ya mapa adokdak aser teyangluba tesem tongti akümtsü akok” ta Rahul-i ashi.
Tanü Congress president-i Manipur nung Lok Sabha elections atema nüboyimba maparen tenzüktsü.
State shia ya khenyongi balaka lir aser Congress party-i shinga nema Manipur aser tanga northeast state tem indang sobaliba, oshioben aser putiotsü nung mekongshidaktsütsü ta pai nangzük.
Congress party-i sorkar akümtsü tashi anguba sülen infrastructure den külemi shisaliok rejutem renlokdaktsütsü. Centre nung BJP sorkari tiyazü tenangzükbatem agi ta Rahul-isa shisem.
Iba sentong nung Congress Legislature party lennir aser taoba chief minister O Ibobi Sing-ia o jembi aser Manipur Pradesh Congress Committee (MPCC) President Gaikhangam-i tesentepertem pela agizük.
Tanep Imphal tonga aruba sülen Rahul-i lanurtem aser kaketshirtem den ghonda ka shi ajurutepa sensaksem.
Pai Congress Bhavan atongba sülen Imphal nung aliba Shaheed Minar nung naro yuja tetushi agütsü. Paisa Imphal nung otsüsütsü aketba Ima Market (women’s market) semdang.
AICC President Rahul-i Imphal semdangba sülen Agartala-i apusoa ao. Agartala nung o jembidang Rahul Gandhi-i ashiba agi, BJP-i Northeast India anema inyakba maparen nisung ajaki meteta lir.
“Tripura nung mapa manguba tebilemtsü kanga ulua kümogo aser tanü lanur lakh 7.5 shi mapa mangu timtemer. Tripura nung lanurtem ya asüngdangnür- BJP-i zünger mapa manguba lanur nem mapa agütsü asü masü” ta Rahul-i asüngdang.
“Onoki lisopurtem yaritsü atema Tribal Bill yanglu saka Narendra Modi-i iba ozüngji Tripura nung samatsü” ta paisa shisem.
Congress-i Citizenship Amendment Bill (CAB) anema noktaktsü aser sorkar akümtsü tashi ngura CAB agientsü. Onoki sorkar kümra Northeast Industrial Policy tanaben tenzükshitsü, ta Rahul-i metetdaktsü.
AICC President Rahul-i yashi nungi anogo ananü atema Arunachal Pradesh, Manipur aser Tripura nung mungzüka Lok Sabha Elections atema nüboyimba maparen tenzüktsü.