Congress-i Northeast yaritsü: Luizinho Faleiro

Dimapur, April 1 (TYO): NDA sorkari developmental scheme tem agienba ajanga linük nung aser talisa north east state tem terenlokba mali kümogo, ta All India Congress Committee (AICC) general secretary aser North east state tem in-charge Luizinho Faleiro-i ashi.
North East state tem special category status kübok tajangzük aika ngua liasü saka BJP sorkari ibaji agien. Taoba election nung parnoki aika nangzük saka meinyaktsü aser northeast nung rongsenkettsüng jenjang mejungi kümdaktsü, ta Faleiro-isa ashi.
Centre nung Congress-i sorkar kümra, Northeast nungi agienba policy ajak meyipa bener arutsü aser sensaker nem minimum income guarantee scheme agütsütsü, ta paisa nangzük.
“Northeast nung telok balala lemsar sobaliba maitsü samatsütsü merangertem nem tamakok ngudaktsütsü atema Congress nem vote agütsütsü mepir. Onoki sorkar kümra Naga yimten tebilemtsü atema inyaktsü,” ta Faleiro-isa metetdaktsü.
Tangatetba balala nung noktaka liaka Naga People’s Front (NPF)-i linük kümzüktsü aser terenlok lenmang nung jajatsü angatet. Nagaland Lok Sabha election aser Mokokchung district kübok 26 Aonglenden AC by-election nung NPF-i Congress candidate yaritsü lemtetba atema kanga pelar, ta paisa shisem.