Congress-i NPF yimsüsüba anema district ajak sema senzü tenzükogo

Kohima, September 08 (TYO): Nagaland nung general election agitsü joko ita ishika dang lia tanü Nagaland nung Congress Party-i state tesem ajak sema Naga People’s Front (NPF)-i aniba DAN sorkari küm 15 tashi junga yimsü masüba osang proktsü atema sentong tenzükogo.
Nagaland Pradesh Congress Committee (NPCC) Tir, Kewekhape Therie leniba nung Congress teloki September 28, 2017 tashi nung district headquarters ajak nung lokti senden ayongzüka akatsü.
Hokolbar nikongdang Kohima nung aliba Congress Bhavan nung Kohima District Congress Committee (KDCC)-i ayongzükba lokti senden nung jembidang Therie-i, “NPF-i küm 15 tashi junga yimsü masü, anungji temelenshi ka atema Naga nunger saaksalemtsü nüngdaka kümogo,” ta metetdaktsü.
“NPF sorkari ochimashi temaba jenjangi ajungketogo, kechiyong par minister tem aser MLA temi project aser contract mapa ajak nung commission meshir, koba ajanga terenlok mapatem junga meinyakteter,” ta paisa ashi.
Tang NPF party telung nung mepetmesü aliba dak sendakba nung Therie-i, “tan aliba NPF sorkari sen aser tashi atema dang merumerua inyaker, aser nüburtem nembo gari lenmang tamajung agütsür, iba den külemi terenlok aliba indang tetshia jembitsüsa kecha mali,” ta ashi.
NPF yimsüsüba kübok senotsü tim mesüi amshiba dak sendakba nung Therie-i, “2003 küm Congress yimsüsüba mapang nung state budget ji sen crore 6,000 dang liasü, ajisüaka tangbo sen crore 15,000 tashi kümogo, ajisüaka senotsü ajak mopung nung samaogo,” ta ashi.
“State nüburtem jenjang tajungba akumtsü atema asenoki NPF sorkar agientsüla,” ta shia Therie-i, state nung district headquarters ajak sema senzütsü nükjidongji Naga lima nungi RSS indang communalist tangatetbatem den külemi BJP aser par teloktep NPF agientsü atema lir, ta metetdaktsü.
Paisa, Naga Peoples’ Council aser Naga National Organisation mapang nung asenok tamangba yimsü, sobaliba, ali aser ali nung aliba rongsentem kümzüka ayutsü atema Arrla 371(A) ajangzüktet, ajisüaka tanübo regional party, NPF-i BJP nungiter, koba ajanga ‘uniform civil code’ ajanga Naga nunger amokmerener, ta metetdaktsü.
NBCC-i ayonga inyakba Clean Election Campaign pusema Congress Tir Therie-isa nüburtem dang candidate ka ket nung rongsen aliba apir masü, saka yimtenren party ka indang election manifesto nung ajemdaker candidate tem shimtsü ayongzük.
Therie-isa, Congress nem maongka agütsüra Nagaland nung nüngdakba temelenshitem bener arutsüba den terenlok aser azükaru lenmangi aniba den ochimashi tera nungi atsüdoktsü, ta ashi.
Kasa sentong nungsa taoba mapang minister aser NPCC Treasurer, Seyiekuolie Kesiezie-i, yimtsüngtem nung aliba nübur shilem 80-ibo Congress yimsüsüba tanaben arudaktsüner, ta ashi.
Sentong nungsa taoba mapang Minister aser taoba NPCC Tir, I. Imkong, NPCC tatong Tir, Khriedi Theünuo, taoba MLA aser NPCC general secretary, Medokul Sophie, NPCC General Secretary, Jonathan aser Working president NPCC i/c of KDCC, Ayangba Aonok nungeria jembia liasü.
Tanü iba senden nung Kohima district kübok yim balala nungi party nung inyakertem, NPCC ketdangpur, taoba mapang MLA tem aser tangartem dena liasü.
Asüng NPCC-i Peren nung lokti senden ayonga akatsü, Sept. 13 nü Mokokchung nung, Sept 14 nü Longleng nung, Sept 15 nü Zunheboto nung, Sept 16 nü Wokha nung, Sept 21 nü Mon nung, Sept 23 nü Tuensang nung, Sept 25 nü Kiphire nung, Sept 27 nü Phek nung aser tatemsa Sept 28 nü Dimapur nung ayonga akatsü.