Congress-i ochimashi anema raratsü: Raj Babbar

New Delhi, August 24 (Agencies): Bodhbarnü Uttar Pradesh nung Congress tongti lenir, Raj Babbar-i, taruba Uttar Pradesh assembly elections nung party atema tongtibangtiba onükji- yimtenren party tem anema masü saka ochimashi anema raratsü, ta metetdaktsü.
ETV News Channel-i interview agidang Babbar-i, “Congress-i Bharatiya Janata Party (BJP), Samajwadi Party (SP) mesüra Bahujan Samaj Party (BSP) anema meraratsü. Party-i ochimashi anema raratsü,” ta ashi.
Pai ashiba agi, nüburtemi BSP pu masemer aser Mayawati’er tongti nisungtemi party toktsüdar.
Uttar Pradesh chief minister candidate atema party-i taoba mapang Delhi chief minister, Shiela Dikshit shimba dak sentakba nung Babbar-i, lai Delhi nung mapa tajung inyakbaji nüburtemi nguogo aser lai aika ajangshia alibatem nungi nüburtem ajangzüktsü, ta ashi.
Taruba election nung Congress-i tanga party den lokteptsü asü, ta asüngdangba langzüdang Babbar-i, Congress indang teloktepji nüburtem den dang lir, ta ashi.
Babbar-isa, UP election atema Priyanka Gandhi-i nüboyimtsütsü, ta osang jangjashitsüogo.