Congress-i ochimashi aser NPF yimsüsüba anema sentong agi

December 14, 2017 nü Congress Bhavan kima Congress lenirtemi KDCC Rally ayonga agiba mapang tangokba noksa nung angur. KDCC Rally nung Congress pusemertem aikati shilem agia liasü.

Kohima, December 14 (TYO): Brihostibarnü Kohima District Congress Committee (KDCC)-i Nagaland nung Naga People’s Front (NPF)-i junga yimsü masüba, ochimashi inyakba aser tanen makai tashi raktepba sangdongtsü atema lokti senden ka ayongzüka agi.
Congress Bhavan kima lokti den jembidang Nagaland Pradesh Congress Committee (NPCC) Treasurer aser taoba mapang Minister, Seyiekuolie Kesiezie-i, tesüiba küm 15 NPF sorkari junga yimsü masüba aser ochimashi inyakba agi state nüburtem laktetogo, ta metetdaktsü.
Paisa, “Naga nungeri temelenshi ka atema atadar, aser iba temelenshiji Congress Party-i dang bener arutettsü, anungji junga yimsüsütsü aser terenlok taliba akatsü atema Congress Party nem maongka agüjang,” ta mepishia metetdaktsü.
NPCC tatong Tir, Khriedi Theunuo-i, “State Assembly elections agitsü mapang ana nung lir, anungji nüburtem dang tan aliba sorkari junga yimsü masüba osang sangdongtsü atema iba ama lokti senden ya sabang tajungtiba lir. Congress Party-i dang terenlok bener arutettsü,” ta ashi.
“Tan aliba NPF sorkar kübok Nagaland nung ochimashi jenjang tang tamajungtiba lir, kechiyong NPF MLA temi parnok tsüngda tashi rakteper, ibaji ajanga junga yimsü masür aser sen tashi ajanga ochimashileni anir,” ta paisa metetdaktsü.
“2018 elections nung maongka dang agütsüra Congress-i state lenla ajak nung terenlok katsütsü ta onoki kuli sayutsü,” ta Theunuo-isa ashi.
NPCC tatong Tir, Ayangba Aonok-i, “NPF sorkar kübok Nagaland ya tamakok anguba state ka kümogo, kechiyong state nung gari lenmang junga mali, terenlok mapatem anenogo, sorkar mapa inyakertem nem itasen aser kaketshirtem nem scholarships magütsür,” ta metetdaktsü.
Paisa, “State terenlok aser azükaru atema NPF sorkar mangdang mali, kechiyong tesüiba küm 15 tashi mapa inyaktsü atema asalentong kecha meyanglui parnoki yimsüsür,” ta paisa ashi.
KDCC Tir, Kevi Vizo-i, NPD sorkar kübok state atema tarutsü nükla mali, ta Naga nunger dang sangdongtsü atema lokti senden ya ayongzük; Congress-i dang sorkar tajung agütsütsü aser lenla ajak nung terenlok mapa inyakettsü, ta ashi.