Congress-i Party manifesto sayaogo

New Delhi, April 02 (Agencies): Tanü Congress-i Lok Sabha election atema party manifesto sayaogo; manifesto nung Congress-i junga yimsüsütsü, aluyimertem sentsüh pungbatsütsü, mapa tasen adokdaktsütsü aser ochimashi anema ozüngtem yanglutsü nangzüka lir.
Tanü New Delhi nung Congress Tir, Rahul Gandhi, UPA Chairperson, Sonia Gandhi aser taoba Ato kilonser, Manmohan Singh nungeri iba manifesto sayatsü.
Congress-isa aluyimertem tebilemtsü onük balala atema MGNREGA 3.0 tenzüktsü nangzük. “Iba dak sendakba nung (MNREGA kübok) anogo 150 indang taa agütsütsü, block/district ka nung anogo 100 taa agütsüdar; aser Waterbodies Restoration Mission den Wasteland Regeneration Mission nung MGNREGA aayangertem amshitsü,” ta parnoki nangzük.
Congress-isa, Northeast India nüburtemi maginüaka BJP sorkari kangshia benokba Citizenship Amendment Bill agientsü, ta nangzükogo. North East state tem nung party-i special category status asentenshia agütsütsü aser industrial policy benoktsü, ta Congress-i nangzük.
Manifesto nungsa aluyimertem atema budget temeja ka alitsü aser GST kübok saru ka dang asütsü, ta shia lir.
Tang aliba mapatem kümzüka ayutsü aser mapa tasen adokdaktsütsü, iba dak alia linük tesem ajaklen aluyimertem dang sentsüh atoktsü, ta party-i nangzük.
Congress-i Nyuntam Aay Yojana (NYAY) scheme- Minimum Income Support Programme (MISP) agütsütsü; iba scheme kübok India nung kanga sensaker kibong shilem 20 nem küm shia sen 72,000 (ita shia sen 6000) agütsütsü, ta nangzük.
Ato kilonser, Narendra Modi sorkar kübok Rafale deal densema tezüngzüktep agiba ken o aika bushisüngdangtsü aser ochimashirtem linük yutsür jendaktsüba tatalokbatem bushisüngdangtsü, ta manifesto nung shia lir.
Party-isa Industry, Services & Employment Ministry tasen tenzüktsü nangzük.
Party-i Jammu & Kashmir nung tensa tajungba akumtsü atema inyaktsü, J&K nung Armed Forces (Special Powers) Act reprangshitsü aser Disturbed Areas Act reprangshitsü, ta manifesto nung shia lir.
Party osang ka ajanga ashiba agi, party manifesto committee-i küm ka agia iba manifesto renem, aser iba mapang nung parnoki linük balala nung nüburtem aser onük balala nung mongintem den senden 120 ben tashi mena liasü.