Congress-i party tashi itta aliba state tem kümzüktsü meranger: Nabi Azad

Guwahati, Tsüklai 26 (Agencies): Congress lenir tain, Ghulam Nabi Azad-i, Congress-i party tashi itta aliba Meghalaya nung dang rangloker, ajisüaka Tripura aser Nagaland na nungbo election magidangyongi tamakok angutsü nangzükogo ta asüba osangji tai, ta metetdaktsü.
Shillong nung Meghalaya election atema nüboyima senzüba sülen Guwahati nung jembidang pai, “Onoki sendoka mali, ajisüaka Nagaland aser Tripura na nung onok jenjang mejungi kümogo,” ta ashi.
Tang Meghalaya nung Congress sorkar lir, aser maneni iba state nung party-i takok angutsü nükjidong nung meranga inyakdang parnoki Tripura aser Nagaland nabo sendoka yutsür ama reprangteter.
Tesüiba küm ana tsüngda nung Congress-i Assam aser Manipur naprongla nung tamakok nguogo. Ano Arunachal Pradesh nunga BJP sorkar lir.
Taküm küm tatemlen Mizoram nunga election agitsü, aser iba state nung Congress sorkar lir.
Congress lenir, Azad-i, Congress-i party tashi itta aliba state tem nung sorkar kümzüka ayutsü rangloker inyaker, ta metetdaktsü.
“Meghalaya nung ozü sorkar lir aser Assam o Mizoram na nung ama yangji (Meghalaya) onok tashi itta lir. Onok tashi itta aliba state tem onoki kümzüka ayutsü meranger,” ta ashi.
Assembly menden 60 aliba state, Nagaland nung tan election nungbo Congress-i menden tesadang-a majung nung toktepdaktsür. Candidates pongui tenüng agienba sülen party candidates 18 dang kümogo. Tesüiba mapangtem nung Nagaland nung Congress sorkar asemben liasü- 1986 nungi 1988, 1989 nungi 1990 aser 1993 nungi 2003.
Ano Tripura nung party-i menden 60 nungi candidates 56 toktepdaktsüogo. Iba state nunga Congress sorkar asemben tashi liasü- 1963 nungi 1971, 1972 nungi 1977 aser 1988 nungi 1993 küm tashi.
Ano Meghalaya nunga Congress-i menden 60 nungi candidate 57 toktepdaktsütsü.
Meghalaya nung Congress-i tentetben tashi yimsü süogo- 1976-1978, 1981-1990, 1992-1998 aser 2003 küm nungi tang tashi.