Congress-i Rafale deal aser Assam NRC anema longkak aittsü

New Delhi, Luroi/August 04, 2018: Tanü New Delhi nung Congress Party Tir, Rahul Gandhi, taoba Ato kilonser, Manmohan Singh,  Ashok Gehlot aser Ghulam Nabi Azad nunger Congress Working Committee (CWC) senden nung adenba noksa nung angur.

New Delhi, Luroi/August 04 (Agencies): Tang tasen tentetba Congress Working Committee (CWC)-i tanü senden ka mena tang yimtenren tensa aser tongtibang onüktem nung o lemtepa liasü.
CWC senden nung Rafale fighter jet alizükba, Assam National Register of Citizen (NRC) aser PNB ochimashi onüktem densema onük aika nung o lemtep.
Senden nung CWC züngsemtemi onük aika nung ajemdaker Narendra Modi-i aniba NDA sorkar aitsütsü atema bangjema liasü.
CWC züngsemtemisa PNB ochimashi ken o nung BJP-i Nirav Modi aser par kinünger Mehul Choksi na anema kecha meinyakba atema BJP yimjak nung aitsütsü; India aser France na tsüngda sen crore aika jenjang Rafale fighter jet aliba ochimashi onük aser Assam nung National Register of Citizens (NRC) survey anema nokdaktsü atema bangjem.
“NRC ji Congress party-i mezüng benok, ajisüaka iba onük nung telemsa adokdakja Narendra Modi sorkari yimtenren nung tajangzük angutsü meranger,” ta CWC züngsemtemi aitsü.
CWC-i ashiba agi, Congress-i Assam NRC anema menokdaker, ajisüaka iba inyakyimji taoba mapang Rajiv Gandhi Ato kilonser inyakdang Assam Accord sign asüba nung ajemdaker inyaktsüla, ta metetdaktsü.
Assam NRC onük nung Centre sorkar aija CWC-i, iba inyakyim junga mebenokba ajanga Assam nung tensa raksaja nübur melungjang nung tetsübu aitdaktsüogo, ta metetdaktsü.
NRC tatembangbuba draft Chiteni/July 30 nü sangdonga liasü, aser iba draft nung nisung lakh 40 tenüng züngdoka parnok timtem tensa ka nung yutsüogo, ta CWC-i metetdaktsü.
CWC-isa, kobi melii party-i asalentong yanglua BJP sorkar anema longkak aittsü, ta metetdaktsü.
CWC züngsemtemisa taküm state pezü nung agitsü aliba Assembly elections aser 2019 küm Lok Sabha elections atema tanga party tem den teloktep atema jembi.
Tanü Congress Party Tir, Rahul Gandhi leniba nung CWC senden amen, aser iba senden nung adenertem rongnung taoba mapang Ato kilonser, Dr Manmohan Singh aser party nung lenirtem- Ashok Gehlot, AK Antony, Ghulam Nabi Azad, Ahmed Patel, Ambika Soni aser Mukul Wasnik nunger densema liasü.
Tanü iba senden nung taoba Congress Party Tir, Sonia Gandhi bo medentet.