New Delhi, November 01 (Agencies) : Bhopal central jail nungi jena aoer Students Islamic Movement of India (SIMI), telungpur 8, police den kahtepdang kahsetba, police tasü tait mapa congress aser tanga opposition party temi nemja aser luja jembiba atema BJP-i aitsüogo.
Osangbenertem den senden amenba mapang Bharatiya Janata Party (BJP) nung Tongti Tezülur Shrikant Sharma-i, congress-i political tsütsü tajangzük ngunüdang iba tatalokba aitsübaji tai, ta ashi.
“Kiralongratem tepsetba mapang congress-i teti security inyakyim ateter. 2008 küm Batla House, Mumbai amakdangang parnoki yamaji inyak. Sepaitemi parnok taküm samatsü metsübui kiralongrartem samatsütsü inyaker saka külenbo Italy Congress-i parnok Muslim nunger indang vote mesamanüdang item mapa aija kazür. Iba ama yimsü asübaji shitakbabo linük nung Muslim telok mezüngmeshirba lir,” ta pai ashi.
Taoba Hombarnep Bhopal jail nungi jena aoba Students Islamic Movement of India (SIMI) telugpur 8 tashi Madhya Pradesh Police aser parnok indang Anti Terrorist Squad (ATS) na senteper kahset. Aji oda süaka Congress, Aam Aadami Party aser Left party temi iba tatalokba aija jembi.
Kechiba kiralongrar pu asemer, ta Sharma-i Congress dang asüngdang.
“Pakistan tetuyuba kübok linük nung kiralongra mapa inyakertem Congress-i kechiba asemerar onoki mangateter. Tang kahsetba SIMI telungpur 8 ji Osama Bin Laden pusema pa nungita inyakertem lir. Ni Italy congress nung Tatong Tir Rahul Gandhi dang kechiba parnoki kiralongrartem pu asemer saka sepaitem mapa ateter ta asüngdangner,” ta Sharma-i ashi.
Pai, telungpurtem jail nungi jena aodang tepseta yutsüsang, constable Ramshankar Yadav atemabo congress-i ola madoker, ta shisem.
Sharma-i, Mumbai amakdanga congress Tongti Tezülur Digvijaya Singh-i RSS aitsü aser parnok home ministry-i kiralongrar Afzal Guru atema aria bilemba lemsatep, ta ashi.
Congress-i terenlok tsütsü BJP den metokteptettsü anungji parnok lokti politics asayar, saka iba ama politics jagi parnok ang akoksar anentsü, ta Sharma-i ashi.
You must be logged in to post a comment Login