Congress-i Separatist ama jembir: Jitendra

New Delhi, February 17 (Agencies): Tawa Army tongti, Bipin Rawat-i Jammu & Kashmir nung army-i telungpurtem anema army operation aodang nüburtemi tetsükdaktsü agütsüba atema temerenshi agutsütsü ta jembiba o pusema tanü Bharatiya Janata Party (BJP)-i, Congress-i Separatist tem ola nung jembir aser yimtenren tajangzük atema Army nung yimtenren onük aitdaktsür, ta aitsü.
Congress Party lenirtemi General Rawat-i jembiba o aitsüba atema Jammu & Kashmir nungi Union minister, Jitendra Singh-i, General Rawat-i jembiba oji amokmeren o ka masü saka civilian kümzüka alitsü atema tebilemtsü kaa jembiba onük ka lir, ta metetdaktsü.
Yangi osangbenertem senden ka nung jembidang Jitendra-i, “Congress-i iba tatidang mekoktetba ya tebilemtsü ka lir. Iba party-i yimtenren tajangzük atema ajak inyaker. Parnoki yimtenren nung tajangzük angutsü atema Separatist ama jembir,” ta aitsü.
Ghulam Nabi Azad aser Sandeep Diskhit nunger ama Congress lenirtemi item ama o jembiba ya ajanga Congress ya National party ka memesüki kümdaktsür, ta paisa aitsü.
General Rawat pusema Union minister-i, “Army tongtii jembiba oji amokmeren o ka masü saka nüburtem atema bilemtsüba o ka lir. Telungpur anema operation aodang tai maket nisungtem takoksa angutsü atema pai bilemtsür. Pai shinübaji, injang yokba matsüngdangi nüburtem marutsüla,” ta ashi.
Brihostibarnü National Conference otongdar, Junaid Azim Mattu-i, Army tongtii jembiba oji tejashitsüka lir, ta aija liasü.
Tawa General Rawat-i, Jammu & Kashmir nung army temi telungpur anema operation aodang nüburtemi tetsükdaktsü bener arutsüba ajanga sepaitem aika yirur aser asür, iba den külemi khenkhenbo nüburtemi kiralongrartem yaria jendaktsür, ta jembia liasü.