Congress-i signature campaign ka tenzükogo

Itanagar, Rongchii 24 (Agencies): Arunachal Pradesh Congress Committee (APCC) puri state nung panchayat elections takaratiba nung agitsü asoshi khanga Tentonü ‘We the people’ signature campaign tenzükogo.
Iba campaign nung mezüngbuba sign asüsangji APCC tir Takam Sanjoy liasü. Pai ashiba agi, panchayat election mapang shidak nung agitsüba atema Rongchii (April) 11 nü tezüluba nung temepeshiba agütsüba dak sendakba nung Anghi telangzüba kecha magütsüba sülen Congress-i iba inyakyim ya achaayanga inyaktsüsa aküm.
State nung panchayat election magitettsüsa inyaktetba atema BJP sorkar aija Sanjoy-i ashiba agi, panchayati raj inyakyim three-tier nungi two-tier-i melentsüba aliba ajanga iba inyakyim menur, ta ashiba ya kuli shidak masü.
“Three-tier system nungi two-tier-i melenshitsüba atema küm ka mesera ita trok magir,” ta Sanjoy-i ashi.
1992 73rd Amendment Act ateshia APCC tekolakbai ashiba agi, panchayat body ka ya küm pongu sülen ango kata jilia mesera anogo kata memunui tembanger. Ajisüaka panchayat ka kechisüdir süaka alitsüla, aji asünungdang Centre nungi yokba fund tem kecha tetsüdaktsü makai agizüka agitettsü, ta pai ashi.
“Küm pongu sülen Finance Commission-i panchayat ka nem sen crore 100 nungi 120 tashi agütsür, ajisüaka panchayat ka kümteta melira fund tem angutsüba nung menutsü,” ta paisa shisem.
Sorkar ya nüburtem aser terenlok anema, ta shia Sanjoy-i ashiba agi, “iba sorkar yagi yimsüsütsüba memetet.”
Congress puri iba election agitsü menuba kuli meshiogo, parnoki ashiba agi, election nung indoktsüba budget sorkari latettsüla aji asünungdang State Election Commission-i election inyakyim tenzüktettsü.
Signature campaign ya state ajunga nung Congress’ frontal wings tem ajanga yimtsüng aser block level nung ayongzüka akatsü. Iba sülen party-i state nung aliba nüburtem takhangba asadangtsü asoshi Angh den ano tanaben ajuruteptsü.
Maneni Sanjoy-i Centre dang arishi küm 12 dak tekübok tetsür tanurtem tashiyim agi raksatsürtem nem tasüba agi temerenshi agütsütsü asoshi telemtetba agiba dak sendakba nung ashiba agi, “arishi küm mebendangi temerenshi ya kasa dang agütsütsüla.”
Pai par party women wing dang tashiyim agi tetsür raksatsürtem nem tasüba agi temerenshi agütsütsü asoshi ajang ajanga akhangtsü ajungshi.