Congress-i state tenüng menüktsür: MP CM Chouhan

Bhopal, August 19 (Agencies): Tanü Madhya Pradesh Chief Minister, Shivraj Singh Chouhan-i Vyapam ochimashi ken o nung pa teka merüka lir ta ashiba den külemi Congress-i tiazü nung tai balala tongloktsüba ajanga state tenüng menüktsür, ta ashi.

“Congress-i merumerua yimtenren nung tajangzük angutsü nükjidong nung Vyapam ochimashi ken o nung linük ajunga aser alima matsüngdang Madhya Pradesh tenük menüktsüba ajanga tang ni mepelai lir,” ta interview ka agiba mapang Madhya Pradesh chief minister-i ashi.

Congress-i nisung asübatem ya Vyapam ken o den sentakteptsür ta aija Chouhan-i, “Linük tesem ajunga nung Congress-i melung malemtsüsa osang porokba ajanga state tenüng menüktsüogo,” ta ashi.

Taküm November ita nung Chouhan Chief Minister inyaker küm 10 ajungtsü aser tawa BJP-i civic election nung takok junga ngutetba asoshi pa kanga peladagi.

Paisa, CBI-i Vyapam ken o bushisüngdangba maparen atemba sülen ochiji jungkai adoktsü, ta ashi.

Pai ashiba agi, Congress-i pa aser par kibong yirutsütsü merangogo saka Madhya Pradesh nung BJP meyirutsütet.

“MP nüburtemi ochiji meteta lir. Congress-i state tenüng menüktsütsü merangbaji parnoki memelatsü. Tan civic election nunga onoki takok nguogo,” ta pai ashi.

“CBI-i bushisüngdangba maparen atemba sülen ochiji ajak jungkai adoktsü ta ni tamang kanga akar. Vyapam ken o nung ni kecha aibelena mali aser yimtenren nung ochiba lenmangji tajungtiba ta ni amanger,” ta paisa ashi.

“Ni kü mapa ochishia inyaker. Kechi südir süaka ni ochi nung alir. Democracy nung Chief Minister ya nüburtem kilir lir. Iba tangatetba nung ni inyaker,” ta pai ashi.