Congress-i tatar hoho nung ‘intolerance’ atema olemtepner

New Delhi, November 24 (Agencies): Aamir Khan-i lokti nung animesüngzüki sensena alir, ta ashiba dak sentakba nung, Lok Sabha nung Congress lennir Mallikarjun Kharge-i, ‘intolerance’ dak sentakba tebilemtsü ya tan tsüngküm nung tatar hoho senden amendang benoka jembitsüla,” ta Aamir Khan-i jembiba pusema ashi.

“Aruya-a aliba tatar hoho senden nung iba tebilemtsü benoka jembitsü asoshi onoki osang agütsüogo,” ta Kharge-i ashi.

Taküm atema tsüngküm tatar hoho senden November 26 nü nungi tenzüktsü.

Bollywood actor Aamir-i jembiba o pa dang tebutsüi ashiba sülen pai, nübur shisatsü tipmetemdaktsüi tetsübu agi sünga kümdaktsübaji kechi ajangar sorkari bushidangtsü nüngdak, ta ashi.

“Nisung kati kechiba yamai bilemer aser ashir ta sorkari kanga aroka shisadanga bushisündangtsü nüngdak,’ ta taoba mapang railway minister Kharge-i ashi.

Ano Congress Tir, Rahul Gandhi-ia twitter ajanga linük nung tangar ka tamangba aser teshinüba mezüngshiba (intolerance) tebilemtsü tali akümba nung Aamir Khan-i ashiba pusema lemsatepogo.

Aamir Khan-i, “Tesüiba ita trok nungi ti tashi temulung kanga ila bilema liasü. Kiran kena India nung taküm piyong alir. Ni Kiran den kidang sensak asemba mapang lai kü dang tan mezüng, India toktsüti ni ? ta asüngdang. Iba oji kanga dang tebilemdangtsü o ka lir,” ta ashi.

Aamir-i, “Kinungtsüi ozü tanur asoshi tsübua bilemer. Ibaji ajanga la shisatsü nung tetsübu aienba sayur,” ta ashi.