Congress-i TR Zeliang tazüngba kuli bushisüngdangtsü akhanger

Kohima, November 9 (TYO) : Nagaland Pradesh Congress Committee (NPCC)-i chief minister T R Zeliang (Taditui Zeliang) indang tazüngba kuli bushisüngdangtsü atema enquiry committee ka tentettsü takhangba agütsür.
Peren (ST) Assembly Constituency nungi 12 buba Nagaland Legislative Assembly election atema returning officer matsüngdang nomination asüdang TR Zeliang-i Form-26 nung pa 1980 küm Bachelor of Arts (BA) takok angu ta tiyazü kuli agütsü, ta NPCC working president P Ayang Aonok-i Nagaland Angh dangi züluba shidi nung shia lir.
1980 küm pa North Eastern Hill University kübok Kohima College nungi B.A takok angu ta T R Zeliang-i affidavit nung shia lir, ta NPCC-isa ashi.
Congress züngsem kati bangdakpur ket nungi RTI ka ajanga TR Zeliang indang educational qualification kulikakettem nguogo. Iba nung pa 1979 küm Kohima College nung BA tatidang agütsü saka tamakok angu aser iba sülen 1980 nungbo pai BA Examination magütsü, ta NPCC-isa metetdaktsü.
“Linük Temzüng kübok Chief Minister T R Zeliang-i tenangzükba agia sorkar menden tematiba nung amen saka pai NPF party nem dang masü saka Nagaland nung alir ajak nem osang tejangja metetdaktsütsüla. Pai 1980 küm BA tatidang nung takok anguba indang kuli yimjak nung metetdaktsütsüla” ta NPCC-isa sangdong nung shia lir.
Iba dak sendakba nung Angh-i enquiry committee ka tenteta T R Zeliang-i Form-26 affidavit nung agütsüba osang tejangja bushidaktsütsüla. Iba enquiry committee-i bushitetba osangji yimjak nung metetdaktsütsüla, ta NPCC-isa takhangba agütsü.