Congress-i Tripura panchayat election nung tokteptsü

Agartala, June 21 (Agencies): Taoba Parliamentary election nung Congress-i Tripura nung jenjang yanglushiogo aser state nung Opposition party tongtiba kümogo. Iba jagi taküm July tatemlen shilem asem lemsar alitsü aliba panchayat elections nung parnoki menden ajak nung tokteptsü telemtetba agiogo.
Yashi Agartala nung Tripura Congress president Pradyot Kishore Debbarman-i iba osang metetdaktsü.
Congress Bhavan nung osangbener senden ka nung Debbarman-i AICC national secretary & Tripura in-charge Bhupen Vora, senior vice president Pijush Bhowmik aser tanga lennir tejentem lia iba osang metetdaktsü.
“Congress-i panchayat election nung toktepba dang masü saka BJP den tashi itta raratsü. Panchayat elections ya kanga tongtipang asü nung onoki district ajak nung mapa 80% tashi inyakogo. Tripura nung Congress indang vote ji 1.6% dang liasü saka tang jenjang tanabuba tongtetogo. CPI-M samaogo aser tang parnok Tripura nung mali” ta Tripura PCC president-isa metetdaktsü.
Election magidang chief minister-i ‘Congress-i deposit ajak akoksatsü’ ta jembia liasü saka asangsang nung IPFT-ia takoksa ajuru. Parnok ya sorkar nung dena lir, ta Debbarman-isa ashi.
Taruba gram panchayat elections mapang law & order shitak ayutsü aser election tiptema agitsü atema onoki chief minister den ajuruteptsü, ta paisa shisem.
CPI-M-i mapa kecha meinyaker aser BJP nem parnok sünütsü südaktsür, ta paisa CPI-M aitsü.
Tripura nung BJP sorkari Vision Document nung nangzükba meinyaktsür. Parnoki government sector nung mapa 50,000 adokdaktsütsü mesüra MGNREGA sen anogo ka nung Rs 340 agütsütsü ta nangzük saka meinyak, ta AICC secretary and in-charge of Tripura, Bhupen Bora-ia ashi.
Tripura nung Congress indang votes 1.6% dang liasü saka tang ibaji 26% jungogo. Tripura nungertemi BJP-i küm ka yimsü asüba agi laktetogo aser elections timi agira, Congress-i takok mengutettsü. Iba jagi Tripura nung tetsübu tensa adokdaktsütsü atema ozüng alema mapa inyaker, ta paisa ashi.
State sorkari Congress züngsemtem dak tashiyim mapa inyakba anentsüla. Onoki chief minister den ajututepa democracy kümzüka yuang ta ashitsü, ta Bora-isa shisem.