Congress-ia BJP den yaritep: NPP

Shillong, March 26 (Agencies): National People’s Party (NPP) ya BJP indang ‘Team B’ ta Congress-i aitsüba atema tanü NPP-i o meyiptsü.
Taoba mapang Jaintia Hills Autonomous District Council (JHADC) nung Congress-i BJP den yaritepa amadoker ama lir, ta NPP-i ashi.
“2018 nung JHADC indang Executive Committee tentetdang Congress-i BJP den yaritepb amadokogo” ta NPP State president, Dr W Kharlukhi-i ashi.
Iba mapang Congress, UDP, BJP aser NPP tsüngda yaritepa EC kümtet saka tangbo parnoki iba tesentaktep indang mejembir, ta Kharlukhi-isa ashi.
Meghalaya nung Congress-i parnok ajungtsü atemabo BJP den tesentaktep yur inyak saka tang parnoki BJP den tesentaktep ayuba atema ashishiteper, ta paisa shisem.
NPP-i BJP den tesentaktep ayuba ajanga party akoksar asü masü ta asüngdangdang party president Conrad K Sangma-i BJP den tesentaktep ayubaji angateta lir.
“NPP ya lisopurtem atema tentetba lir. Lisopurtem atema lendong bentsür arura onoki Congress mesüra BJP den tokteptsü” ta Dr W Kharlukhi-i langzü.
“Taoba Assembly elections mapang Congress-i kasa tai tongloktsü. Taoba Chief Minister aser Tura Parliamentary atema Congress candidate Dr Mukul Sangma-i küm 8 tashi chief minister inyakdang mapa tajung inyakbatem indang jembitsüla” ta paisa ashi.
“Dr Mukul-i mapa tenzükba aika tamakok nguogo. Taoba Congress MUA sorkari Integrated Basin Development Programme kübok mapa balala inyakba atema jembi. Mapatem rongnung State Aquaculture Mission liasü saka tang tashi Meghalaya nung ango peria memetsüteter” ta Kharlukhi-isa metetdaktsü.