Congress lenir aika bail nung lir: PM Modi

New Delhi, Chiteni/July 07 (Agencies): Congress Party aija tanü Ato kilonser, Narendra Modi-i, joko tangbo opposition party dang ‘bail gaadi’ ta ajar, kechiyong par lenirtem aika bail nung chioka lir, ta ashi.
Tanü Jaipur nung lokti senden ka nung Modi-i, “Tanü asüng Congress nung melungtok lenirtem aser taoba mapang minister tem aika bail nung chioka lir,” ta ashi.
Pai ashiba agi, Congress party tebilembaji nüburtemi meteta lir, aser tangbo parnok dang ‘bail gaadi’ aja tenzükogo.
2016 küm Indian army temi Pakistan-occupied Kashmir (PoK) nung surgical strike aoba dak sendakba nung pai Congress aija jembi.
“Yimtenren nung tanemertemi Army tashi nung tasüngdangba akaba ajanga tai menaogo. Iba ama ya kodanga mesüdang aser iba ama politics asayar dang nüburtemi tai matoktsü,” ta Modi-i ashi.
BJP-i yimsüsüba state- Rajathan nung Centre aser state indang welfare schemes ajanga tajangzük angurtem atema ayongzükba lokti senden nung jembidang Modi-i item o ya jembia liasü. Taküm küm tatemlen Rajasthan nung assembly election agitsü.
Ato kilonseri lokti senden agiba tesem nungjagi remote control ajanga Rajasthan kübok district balala nung sen crore 2,100 indang project 13 atema lung azüngja liasü.
Congress maneni aija Modi-i, kibong ka politics benshiba party temi maneni yamaji inyaktsüa akok, ajisüaka BJP sorkaribo linük defence aser akhümket atema inyaker, ta ashi.
“Tanü asen linük ya kanga tongtibang tensa ka nung lir. Onoki lenmang tasen ka nung jajadar, aser ni amanger- nenok ajakli amalitepba ajanga item nükjidong ataloktsü,” ta Ato kilonserisa ashi.
Kasa sentong nung state Chief minister, Vasundhara Raje-ia Congress aija, Congress-i par nisungtem dang tajangzük ngudaktsütsü atema inyaker, ta ashi.
Iba sentong nung state Angh, Kalyan Singh aser Union minister tem- Gajendra Singh Shekhawat, Arjun Ram Meghwal, Rajyavardhan Singh Rathore, P P Chaudhary aser C R Chaudhary, BJP state Tir, Madan Lal Saini aser party lenirtema dena liasü.