Congress lenir kari Pakistan pusemer: BJP

New Delhi, August 16 (Agencies): Mongolbarnü BJP-i, Ato kilonser, Narendra Modi-i Independence Day onük nung Balochistan aser PoK indang jembiba sülen Congress lenir kari Pakistan pusemer, ta aitsüogo.
BJP-isa, August 12 nü party ajak senden nung Ato kilonseri Pakistan-occupied Kashmir (PoK) aser Balochistan indang jembiba sülen opposition tongti party-i temalen nungi Pakistan pusembaji tejashitsüka lir, ta ashi.
BJP lenir aser Information & Broadcasting Minister Union Minister, M Venkaiah Naidu-i, “International onüktem nungbo India-i obang ka ser jembitsüla. Ajisüaka Congress party-i obang ka ser mejembir. Salman Khurshid-i agütsüba sangdong ka lir, Kapil Sibal-i agütsüba sangdong ka lir, aser Congress otongdar Randeep Surjewala-i agütsüba sangdong ka lir,” ta ashi.
BJP National Secretary, Sidharth Nath Singh-ia, “Linük onüktem nung Congress tangatetba nung telemsa alibaji tejashitsüka lir. Party nung telemsa aser par lenirtemji  Sharm el-Sheikh nung külem sangdong ajanga sayur,” ta ashi.
“Par lenirtemi Pakistan pusemer ama reprangteter. Modi-i Balochistan aser PoK indang jembibaji linüki pusemer,” ta Singh-isa ashi.
Yashi Congress lenir, Khurshid-i Modi aija, “Ato kilonseri Independence Day onük nung Balochistan onük süoka jembiba ajanga PoK nung India onük raksatsüogo,” ta aitsü.
Ajisüaka Congress-ibo Khurshid-i jembiba o nungjagi pilaa sorkar dang, Pakistan aser International jenjang tashi nung Balochistan aser PoK nung ozüng alema inyakbatem indang onük süoka jembiang, ta shiogo.