Congress lenir kari Rahul Tir mekümdaktsünür: AICC Secretary

New Delhi, December 6 (Agencies) : Pei agitsü tang bilemba party lenir kar-i Rahul Gandhi Congress party nung Tir shimtsü asoshi mapang atsülangtsür, ta party ketdangser kari ashi.
Osang ajanga ashiba agi, congress nung lenirtem lemdanger telok kati Rahul Gandhi ya aruyaa aliba Assembly polls sülen ang Tir kümdaktsünür aser lenir kari tang tensa dak ajemdaker Sonia Gandhi nemsa Tir menden ji agidaktsünür.
Uttar Pradesh, Punjab, Gujarat, Himachal Pradesh aser Goa state tem 2017 nung Assembly election agitsü sentong lir.
Kum 46 tain Rahul Gandhi ya 2013 January ita Jaipur nung senden amendang Tatong Tir shima liasü. Aser pa party nung Tir akümtsü asoshi jembia arudaki. Rahul tetsü Sonia Gandhi-i Congress party nung küm 18 tashi Tir inyakba otsü yanglua lir. Lai Sitaram Kesri melena 1998 küm nungi Congress Tir inyaker.
November ita Congress Working Committee (CWC) senden amendang Rahul Gandhi nem Tir menden agütsütsü asoshi party züngsemtem-i shia liasü. Iba anogo nung Sonia Gandhi senden nung maliasü.
Congress party nung lenir Digvijay Singh, Kamal Nath, Jyotoraditya Scindia aser Sachin Pilot nungertem-i Rahul ji party nung Tir shimtsü atema aiben jembia liasü.