Congress lenirtemi CAG ajurua Rafale deal osang meshi

New Delhi, Rongjui/September 19 (Agencies): Tanü New Delhi nung Congress Party nungi lenirtemi Comptroller and Auditor General of India (CAG) ajurua Rafale fighter jet aliba onük nung ochimashi osang bushisüngdanga tekaraba nung osang agutsütsü takhangba agutsüogo.
CAG nem temepishiba shidi ka agüja Congress lenirtemi, ochiji nüburtem nem yimjak nung metetdaktsütsüla, ta ashi.
CAG ajuruba sülen osangbenertem den jembidang Congress lenir, Anand Sharma-i, “Sorkari fighter jets alizükba inyakyim nung tim masüba aser ochimashi alibatem osang tejangja agutsüogo. CAG-i tekaraba nung osang renema Parliament nung metetdaktsütsü ta onoki imlar,” ta metetdaktsü.
Congress party otongdar, Randeep Surjewala-i, Rafale jets alizükba onük nung osang tejangja indang kuli balala CAG nem agutsüogo, ta metetdaktsü.
Paisa, “Nija ka ajangzükdaktsütsü atema iba onük nung Hindustan Aeronautics Limited agienba indang onoki CAG nem metetdaktsüogo. Kobi melii CAG-i osang agutsütsü onoki imlar. CAG-i onok dang parnoki lenla ajungalen nungi ibaji asadangdar ta shiogo. Iba osangji yimjak nung nüburtem nem metetdaktsütsü aser ochimashiji jungkai adoktsü onoki imlar,” ta ashi.
Taküm küm tatemlen state ishika nung assembly election agitsü lia, aser sangküm Lok Sabha election agitsü lia Congress-i France linük dang nungi Rafale jets alizükba nung ochimashi lir, ta ola adoker.