Congress mesenseni lir: CM Mukul Sangma

Shillong October 6 (Agencies): Taruba küm election matong tsüngda Congress pur telung nung temolung melentep adoka aliba amai reprangteter, saka Chief minister Dr Mukul Sangma-i ashiba agi, Congress pur tsüngda nung kecha mangatettep mali aser tawa temelenshi kar adokba ajanga party lenisüba nung kecha tetsükdaktsü mali.
Tang yimsü tesüdak MLA pongu tashi-i Congress nungi tokteptsü asoshi ticket atema application form magiba dak sendakba nung Sorkar mesenseni lir ma ta asüngdangba nung Chief Minister-i , “Shibai sorkar tashimait arakzüba indang jembir, nenoki arakzüba angur mangur,” ta asüngdang.
“Onoki taoba mapang nung iba amala mepetmesü ajangshia aruogo aser onoki iba amala tensa koda azüoktsüar jangjaa lir,” ta pai ashi.
Kasa mapang nung Dr Mukul Sangma-i ashiba agi, state sorkari Assembly Session akatsüba mapang nung tenüngdakba purtem nem osang tejangja agütsür.
Temetettsükaji taruba Assembly Session ji March-April nung akaba sülen September (taoba session sülen ita 6 lir) tashi nungbo agir alitsüba liasü. Sorkari ashiba agi, June ita special session ka akaba ya tang session ya atsülangtsüba atema jembitsüba asoshi liasü.
“Onoki assembly session ayongba mapang nung osang teperi agütsüogo anungji nenok kecha shisabulutsü mali,” ta Dr Sangma-i ashi.
Dr Sangma-isa ashiba agi, People’s Democratic Front (PDF) pur telemtetba ajanga 2018 assembly election nung Congress pur dang ajangzüktsü.
PDF puri Congress pur yirutsütsü meyirutsütsü, ta asüngdang dang Chief Minister-i ashiba agi, “Ne nenok dang ya dang shidi, iba ajanga Congress pur dang ajangzüktsü.”
Congress nungi anentsür alisang Mawsynram nungi MLA Pynshngain N Syiem-i PDF pur ita ishika tsüngda nung len anitsü.