Congress MLA 8 anema ken o agüja aliba agientsü akang, AICC GS Narayanasamy-i NPCC sentong kaket ka sayatsü

Kohima, Sept. 24 (TYO): Tanü Brehostibar nü All India Congress Committee (AICC) nungi tongti zülur V Narayanasamy aser AICC secretary in-charge Nagaland Jayakumar na aruagi Congress Bhavan, Kohima nung Nagaland Pradesh Congress Committee (NPCC) purtem den senden aliba mapang, tawa K.Therie NPCC tir akümba sülen anentsürtem Congress lenirtemi parnok anentsüba telemtetbaji agientsüla aser ano Congress MLA ti tatar senden nungi anenjang, ta Speaker nem agüja aliba ken o ji meyipa agitsüla ta takangba agüja ayimtenba agi senden magiteti liasü.

Taoba Congress lenirtemi parnoki akangba onüktemji kaket nung zülua bener ayimtenba ajanga senden mekateti khen anena liasü. Parnok jagi ashiba agi, May 2015 nung K.Therie ya BJP telok nung adentsü lia AICC-i pa NPCC tir shimtet. Ano, parnokisa K.Therie NPCC tir kümer külen DCC aser ACCC tirtem anentsüba asoshi kuli meshia mepelaba metetdaktsü.
Taoba Congress lenirtemisa Centre nung Congress sorkar aliba mapang Nagaland nem sen crore 712 agütsü saka NPF sorkar nung Therie chaplee kilonser asüba mapang iba senji mashi amshiogo, ta aitsü.
Parnokisa ashiba agi, India den Naga yimten tebilemtsü ya tatem küma latettsü nükjidong nung Congress MLA tiprongla NPF teloki aniba sorkar nung aden nungji parnok disqualify sütsütsü ken o agüja alibaji khen anena atatsüla ta mepishi saka AICC-i magizük.
Longkak aiter Congress lenirtem jagi senden melitettsüsa ayimtenba manen nungji, senden mendenbubai senden ken anena alitsü metetdaktsü. Iba sülenjia longkak aitertemji AICC aser NPCC lenirtem aoleni orr parnok denji jembia liasü. Iba sülenjiang sendenji tenzük.
Senden tenzüker külen, AICC tongti zülur, Narayanasamy-i ashiba agi, Nagaland nung NPF teloki aniba sorkar nung BJP dena alinungji, iba sorkar nung madentsü asoshi AICC ajanga metetdaktsü saka parnoki tashi mangai aden, iba jagi parnok anema ken o agütsü. BJP o Congress telok na tangatettep nung meputeper, anungji BJP adenba sorkar nung Congress madentsüla ta paisa ashi.
” Congress aser BJP na balala anungji külemi moutettsü, Congress telok ya ‘Secular’ aser BJP telok ya ‘Communal’ ” ta AICC lenirisa metetdaktsü.
August 3, 2015 anogo nung center o NSCN-IM na tsüngda “Naga Peace Accord” renembaji pelaa agizüker, saka iba terenembaji nübortem, dang sayutsüla, onoki taruba tatar senden nung iba terenemba onükji sayuang ta akangtsü ta AICC leniri metetdaktsü.
Iba kasa senden nung Congress telok lenitsü asoshi renemba kaket ka tenüng agi “NPCC Road Map” kaket Narayanasamy-i sayatsü.
Iba sentong nung NPCC tir Wb.Kewekhape Therie-i ashiba agi, iba ‘Road Map’ ya Congress telok asoshi tarutsü nung inyaktsü renemba mangdang kaket ka asütsü . Paisa ashiba agi, taoba Congress lenirtemi mepelaba o kechisa shiogo, item ajaki reprangtsü saka amokmerena masü timi dang inyaktsü.
Iba senden nung AICC secretary i/c Nagaland, Jayakumari tajungshi o jembia liasü aser CBCK sannüker Rev. Dr. Kevekhalo Lasuh den Lai zünga sarasadema senden tenzük.