Congress MP tem Parliament kima Minister Singh anema lungkak ait

New Delhi, December 07 (Agencies): Tanü Congress tatong Tir, Rahul Gandhi leniba nung Congress MP temi Parliament kima Union Minister V K Singh cabinet nungi agientsüla ta takhangba agüja lungkak aitogo.

Tanep Lok Sabha aser Rajya Sabha senden metenzükdang Parliament kima lungkak aitertem rongnung Rajya Sabha nung Opposition Lenir, Ghulam Nabi Azad, Lok Sabha nung Opposition Lenir Mallikarjun Kharge, party lenirtem- Anand Sharma aser Deepender Hooda nunger densema liasü.

Tesülen osangbenertem den jembidang Congress lenir Jyotiraditya Scindia-i, Central sorkari lokti ka anema inyakba yimya ajitetba yong parnoki iba onük benoker, ta ashi.

Paisa, sorkari o agi dang masü saka mapa agia inyaka sayutsüla, ta ashi.

Taküm Faridabad nung dalit tanur ana mi agi rongseta südaktsüba tatalokba dak sentakba nung osangbenertem den jembidang taoba mapang Army tongti aser tang Union Minister teinyaktak Singh-i, nisung kari azü dak lung agi aonba ajak atema sorkar nem tai metongloktsütsüla, ta jembiba sülen yimtenren lenir aikati iba oji ashishia liasü.

Singh ya Minister of State for External Affairs lir.

Iba dak sentakba nung sorkari Singh pusema, Singh-i Dalit indang iba ama oji mejembi aser opposition-i iba onükji benoktsü kuli mali, ta shiogo.