Congress Party-i ‘100 Mistakes of Modi’ kaket saya

Mumbai, March 30 (Agencies): Tanü Mumbai nung Congress Party-i Ato kilonser, Narendra Modi aija züluba kaket ‘100 Mistakes of Modi’ sayaogo; iba kaket nung tapak 100 lir aser Ato kilonseri aibelenba 100 indang shia lir.
Maharashtra State Congress Committee-i adokba kaket ya Congress lenirtem senden ka amenba sülen saya. Tanü Congress office, Dadar, Gandhi Bhavan nung ayongba senden nung Mallikarjun Kharge, K C Venugopal aser Ashok Chavan nunger densema Congress nung tongti lenir aika dena liasü.
Iba kaket nung Congress-i, Ato kilonser Modi-i nangzükba ‘Acche Din’ (tajung anogotem) sector ajak nung raksaogo, ta shia lir.
Iba kaket nung Ato kilonser Modi-i aibelenba rongnung mezüngbubaji Rafale deal indang shia lir. Iba kaket nung ‘Rafale Deal, Ambani’s Win’ tapu ajanga Modi sorkari ochimashiba indang shia lir.
“Kechiba Modi-i France dang Dassault Aviation indang Offset Partner ji Anil Ambani südaktsütsü atema rongshi?” ta Congress-i asüngdanga lir.
“Külen Hindustan Aeronautics Limited (HAL)-i tayimtsü yangluba ajanga alima tesem ajungalen tenüng tajung lir, ano külen Reliance-ibo defence sector nung kecha madokdaktsütet,” ta Congress Party-i shia lir.
“Ato kilonser Modi-i linük indang sen crore meyirjang aika par takar tembar (Anil Ambani) nem agütsüogo,” ta kaket nung shia lir.
Kasa kaket nung ‘Fake Promises; Less Work’ tapu ajanga, mapa ka atema tamendakdak meyangludangyongi jembibaji Modi yimya ka lir. “Modi sorkari mapa dang nungibo advertisement nung sen timba indoker,” ta shia lir.
‘Devil Demonetisation; Economy Drags Down’ tapu nung Congress-i, “Modi-i linük nung demonetization benokba ajanga aonung ka yongi linük nung black money samatsü, ta sangdong. Ajisüaka kecha matalok. Modi telemtetba ajanga nisung 100 dak tema süogo,” ta metetdaktsü.