Congress Party-i UP election nüboyim sentong tenzükogo

Lucknow, July 23 (Agencies): Tanü Congress Party-i sangküm agitsü aliba Uttar Pradesh Assembly election atema nüboyim sentong tenzüka party Tir, Sonia Gandhi aser tatong Tir, Rahul Gandhi nati Delhi nung aliba party office nung bus yatra ’27 Saal UP Behaal’ tenzüktsüogo.
Anogo asemnü bus yatra tenzükba sentong nung tang tasen shimba, Uttar Pradesh Congress tongti, Raj Babbar, taoba mapang Delhi chief minister aser UP election nung party chief minister candidate, Sheila Dikshit aser UP unit AICC general secretary, Ghulam Nabi Azad nungera liasü.
“Tanbo Uttar Pradesh nüburtemi terenlok aginer. Parnoki BJP, BSP aser Samajwadi Party ji telemsa adokdaktsüba party tem lir ta metetogo. Onoki Uttar Pradesh nung yimtenren temerük aginer, aser ibaji ozü onük lir,” ta Azad-i ashi.
“Congress Party-i tamangba yimsü ajak akhümtsübur aser party ya tamangba yimsü ajak tenüng nung lir, aser ibaji Uttar Pradesh nüburtem atema ozü sangdong lir,” ta UP unit AICC general secretary-isa ashi.
Road show mapang Congress-i, tesüiba küm 27 nung  sorkari state junga yimsü masübatem jungkai adoktsütsü. UP nung 1989 küm Congress-i Janata Dal matsüngdang tamakok ngua liasü.
July 29 nü Lucknow nung Rahul Gandhi-ia nüboyim sentong nung party nung inyaker nisung 50,000 ajurutsü. August 2 nü Sonia-i Ato kilonser, Narendra Modi adokba constituency, Varanasi nung road show nung shilem agitsü.
Tang Uttar Pradesh nung Akhilesh Yadav (Samajwadi Party)-i aniba sorkar lir.
2012 election nung Akhilesh Yadav-i aniba Samajwadi Party-i menden 224 tashi ngua simple majority jenjang angu.
Kasa elecion nung BSP-i menden 80 aser BJP-i menden 80 ngua liasü.