Congress Party ji putiotsü ka dang kümogo: PM Modi

Jalandhar, January 27 (Agencies): Congress Party aija tanü Ato kilonser, Narendra Modi-i, Congress-i ano maneni tajangzük angutsü atema yimtenren nung maongka bushir, ta aitsüba den külemi Congress ji tesüiba putiotsü ka dang kümogo, anungji Punjab nüburtemi iba party dak tamang makatsüla, ta ashi.
Ato kilonserisa, Congress ya tzü telungi aiba rong ka lir aser iba rong nungji nisungtemi mamentsüla, kechiyong ibaji ajanga parnoki kecha matongtsü, ta ashi.
Punjab, Jalandhar nung assembly election atema nüboyim senden nung jembidang Modi-isa Sutlej Yamuna Canal onük dak sentakba nung, tzü amshitsü atema Punjab temeten lir, ta metetdaktsü.
Modi-i ashiba agi, Indus ayong indang tzü, koba Pakistan nung amajok nung yimoker, ibaji Punjab-i bener arutsü.
Iba onük nung küm aika Haryana aser Punjab na tsüngda mepetmesü ken o adoka lir.
Tamalen Majitha nung Congress tatong Tir, Rahul Gandhi-i state nung temesepba mozü tebilemtsü atema jembia liasü, aser iba oji meyipja Narendra Modi-i, “Nisung kari Punjab nunger lanurtem tenüng menüktsüba ajanga yimtenren nung tajangzük angutsü meranger,” ta ashi.
Paisa, item ama o ajanga Punjab nunger tenüng tajung menüktsüogo, aser item o atema meyiptsütsü tajungtibaji tan assembly election lir, ta ashi.
Congress maneni aija Modi-i, iba party ya tzü ama lir, aser yimtenren nüngdak apir parnok melenshir, ta ashi.
“Iba party ya balaka. State nung taküm alitsü atema parnoki West Bengal nung Left party den loktep. Parnoki (Left) kwi (menden), agutsü, ibaji agizük. Uttar Pradesh nung parnoki Samajwadi Party aitsü saka parnok den loktepogo. SP nung mepetmesü aliba maongka ngua parnoki iba maongka agi (SP-Congress loktepba),” ta Modi-isa ashi.
“Tesüiba küm 70 nung linük nung teraksatsüba yimtenren liasü, aser tang onoki terenlok yimtenren tenzükogo,” ta paisa shisem.