Congress Party ya joko asayamenü club ka kümogo: Modi

New Delhi, November 02 (Agencies): Brihostibarnü Ato kilonser, Narendra Modi-i, Congress party ya asayamenü club ka kümogo, ta ashiba den külemi ‘linük nung nüburtemi kechiba Congress toktsürar parnoki ibaji meyipa reprangshitsüla’, ta ashi.
Himachal Pradesh, Kangra nung BJP sentong ka nung jembidang Ato kilonser, Modi-i, Congress yimsüsüba kübok state nüburtem timtema aruogo, joko nüburtemi Congress sendoktsü, ta ashi.
Tan November ita iba state nung election agitsü lia Modi-i, “Joko tangbo Congress ya asayamenü club ka kümogo. Parnok chief minister (Virbhadra Singh) ochimashi ken o nung bail nung chioka lir, ajisüaka party manifesto nungbo ochimashi magizüktettsü ta shia lir,” ta aitsü.
Ato kilonserisa maneni ochimashi onük nung Congress aija, “Congress atemabo, Swacchta Abhiyan ya state senpong azüngtettsüba lir,” ta ashi.
“Linük nüburtemi Congress party aser lenirtem toktsüba kuliji parnoki meyipa reprangshitsü nüngdaker. Iba linüki kanga tai atoker. Ajisüaka nai shisatsü tamajung amshia inyakra aser nüburtem ashioktsüra parnoki nenok dang kodanga tai matoktsü,” ta paisa ashi.
Ano Congress lenir, P Chidambaram-i tawa Jammu & Kashmir nüburtem nem tashi tuluba agütsütsü atema jembiba asoshi Congress aija pai, “Kashmir atema sepai mezüngdangteti taküm bendanga agütsüogo, ajisüaka Congress lenir kati Kashmir-i ‘Azadi’ akhangbaji tim ta jembir. Taküm bendanga agütsürtem mezüngmeshitsü atema Congress aser par lenirtem dak temeten mali,” ta paisa ashi.