Congress pusemertemi Delhi nung lungkak ait

New Delhi, Dececember 08 (Agencies): ‘National Herald’ ken o dak sentakba nung Mongulbarnü Congress pusemertem Delhi lenmang nung lungkak aitba mapang Delhi police-i parnok aika pua ayu.
Lungkak aitba mapang Indian Youth Congress (IYC) aser National Students Union of India na den Delhi Congress activist tem dena Teen Murti Marg nungi Ato Kilonser indang official ki aliba tesem, 7 Race Course Road tashi tetsüng agi jaja liasü.
National Herald osangkaket dak sentakba ken o nung Congress tir, Sonia Gandhi aser Tatong Tir Rahul Gandhi na den Congress nung tanishir kar December 19 nü court-i jaokba atema iba lungkak ya ait.
Iba ya Bharatiya Janata Party (BJP)-i yimten tepsetba mapa lir aser Congress lenir ana court-i jaokba ya BJP-i yangluba, ta lungkak aitertemi ashi
Delhi Pradesh Congress Committee Tir Ajay Maken, “BJP teloki sorkar agency tem amshia Congress dak tenük yoker. Parnoki yimten tepsettsü meranger anungji onoki maneni lungkak aitsü,” ta ashi.
“BJP teloki ozü lenirtem aitsür. Court nung nokdangba ajanga parnok ozüng raksar makümer. Onoki court-i ashiba akümtsübur aser parnok December 19 nü Delhi court nung nokdaktsü. Ita ishika tejakdang BJP telok nungi chief minister kati, Sonia jala kinungbo, Robert Vadra memunui tepuokdaki aitsü ta ashi. Pa dak kecha tai mali nung kodaser parnoki yamaji jembir?” ta Youth Congress Tir Amrinder Singh Raja Warring-i ashi.
“Ato kilonseri Gujarat nung ama pa mulungka agi iba mi meremseptettsü. Onok ajemajema mamentsü,” ta Congress lenir Arvinder Singh Lovely-i ashi.
Ano Congress lenir Amrita Dhawan-i, “Ozü lenirtem court-i jaokba ya BJP-i yangluba lir. Parnoki Congress tenüng menüktsütsü asoshi iba ya inyakerba lir. Onoki ozüng kübok kanga akümtsübua anidaker aser ozü lenirtemi court nung nokdangtsü. Parliament senden atema tanishirtemi tajungba inyakang, ajisüaka onokbo lenmang nung ozü lenirtem atema lungkak aitba manentsü,” ta ashi.
“Court nung ken o aika madem yua lir. BJP lenir Subramanian Swamy-i kechiba metemi aliba ken otem atemabo kecha mashir? Kechiba pai Congress yamai arishir? Iba ya Bharatiya Janata Party-i yimten tepsetba mapa lir,” ta laisa ashi.
National Herald osangkaket ken o Subramanian Swamy-i benokba sülen Congress lenirtem December 19 nü obendangdak nokdangtsü atema Mongulbarnü Court kati tetuyuba agüja liasü.