Congress sorkartemi Netaji indang file tem raksatsü

New Delhi, March 30 (Agencies): Mongolbarnü BJP sorkari taoba mapang India nunger nüjiso atema rarar, Netaji Subhas Chandra Bose dak sentakba file kar sayaogo, aser tang tesüsabuba sayaba file tem nung, Netaji samaba aser asüba kulitem samatsüba jangjaogo.

Iba osang ya taruba West Bengal assembly election nung tongtibang onük ka ama amshitsüa akok.

PMO kakettem nung ashiba agi, Bose indang mitsüji Delhi nung Red Fort nung ayutsü benokba densema kaket kar mengutet mesüra samatsüogo.

Item kaket timbaka Congress sorkar mapang, 1960s aser 70s mapa samatsü asütsü akok, ta kaket ka ajanga shia lir.

Mezüngbuba file nung Prime Ministers’ Office (PMO)-i Justice Mukherjee commission dang, “File no. 12(226)56-PM ji 6.3.1972 nü raksatsü; file no. 23(156)51-PM record asüdang iba file nung kaket kar raksatsü; aser file no. 2(381)60-66PM (Subhas Chandra Bose indang mitsü Tokyo (Japan) nungi bener arua Delhi nung Red Fort nung ayutsü benokba) onok record nung mangur,” ta metetdakja liasü.

Item kaketemji kechiba raksatsü mesüra item kakettem nungji osang tejangja kechisa liasü, itemji mejangjar.

Yashi sayaba file 50 rongnung file 10 PMO ket nung liasü, file 10 Ministry of Home Affairs ket nung liasü aser Ministry of External Affairs ket nung file 30 liasü. Item file ajakji 1956 küm nungi 2009 küm tashi indang lir.

Taküm January 23 nü, Netaji asoba 119buba anogomung nung Ato kilonser, Modi-i, Netaji dak sentakba file 100 sayaja liasü, iba mapang nungi tenzüka sorkari ita shia Netaji indang file tem sayaa arudar.

Taruba West Bengal assembly election nung Netaji’er kinünger kati BJP tenüng nung Chief minister, Mamata Banerjee den tokteptsü.

Netaji indang puti otsü bushir aser kaketzülur Anuj Dhar-i, “Congress sorkartemi puti otsü tongtibangtemji kodaser samatsü’ar ibaji bushisüngdangtsüla,” ta shiogo.