Congress telok nungi Itanagar MC züngsem 23 BJP dangi meyip

Itanagar, April 28 (Agencies): Itanagar Municipal Council (IMC) nung Congress telok nungi züngsem 25 liasü, saka parnok 23 BJP telok nung oa denogo.
IMC nung züngsem 30 lir aser parnok züngsem 26 bo Congress telok nungi liasü, saka züngsem ka par telok nungi indokba sülen Congress nungi IMC nung züngsem 25 liasü.
Parnok züngsem 23 BJP nung oa adenba sentong nung Chief Councillor, Kipa Kaku aser Deputy Chief Councillor, Tarh Nachung-nati anir parnok züngsem 20 oa aden aser züngsem asem maparen balala aliba ajanga iba sentong nung medentet saka parnoki tezüluba nung agütsü. Iba sentong nung Arunachal Pradesh Chief Minister, Pema Khandu aser state BJP tir, Tapir Gao nungera arua aden.
Arunachal Pradesh nung Khandu-i aniba BJP sorkar dak temolung alemer aser parnok aliba tesem nungi Parliamentary Secretary, Techi Kaso den parnok dena lir, ta Councillor temi ashi.
State BJP tir, Gao-i parnok pelashishia agizük aser parnok BJP nung arua adenba asoshi kanga pelar ta ashi.
“Tang nungi nenok ajak BJP züngsem lir aser asenok ajak külemi longjemer Itanagar atema kisüng masü saka state ajunga atema terenlok bener arutsü asoshi yaritepa inyaktsü,” ta Gao-i ashi.
Parnok züngsem 23-i BJP dangi meyiptsü molungtetba pela agizüka jembidang, “Prime Minister Narendra Modi lenisüba nung BJP telok ya balaka lir,” ta Chiem Minister, Khandu-i ashi.
“Iba telok ajanga linük tejangraba mezüng südaktsür aser kija tejangrabatem tesü südaktsür. Nükjitong tejangja yur, BJP ajanga terenlok tasen bener arutsü asoshi inyaker,” ta Khandu-i ashi.
State sorkar asoshi mapa inykatsü tongtipangtiba ji capital complex yanglutsü ya lir, ta Khandu-i Councillor tem dang metetdaktsü.
“Itanagar aser Naharlagun yimti ya jakrep ama lir aser iba yimti ana ajanga Arunachal Pradesh indang tejak sayur. Capital complex yanglutsü asoshi ni IMC nungittsü aser teyari agütsütsü,” ta pai ashi.
Iba sentong nung Cabinet Minister, Wangki Lowang, local legislator, Techi Kaso, BJP state tatong tir, Kenyir Ringu, BJP City president, Tarh Soping aser BJP tongti zülur (Org), Ramesh Kharaganchi nungertema arua aden.
Shimla Municipal Corporation (SMC) election agitsü anasa Congress lenir 65 den parnok busemer aika BJP nung oa adenba sülen iba terenlok ya angur.