Congress teloki MGNREGA sen bushir

Dimapur, June 14 (TYO) : Taküm 2016 küm April ita nung Nagaland nem MGNREGA sen crore 442.32 agütsüogo saka tang June ita tom ka ao tashi nunga state sorkari senji yimtaklirtem nem magütsür saka sen crore ishika “mobilization” tenüng nung sorkar nung alirtemi agizüka agiogo ta angazüker ta tanü Mongolbar nü sangdong ka ajanga Nagaland Pradesh Congress Committee nung tir Wb.K.Therie-i metetdaktsü.
“Iba senji minister, MLA aser tulur ishika keti maotsüla, ibaji yimtaklir sen anungji yimtaklirtem nem agütsütsüla,” ta paisa metetdaktsü.
Onoki MGNREGA sen shitak job card alir yimtaklirtem nem agütsütsüla ta nokdakba atema RD minister aser pa den yaritepertemi onok amokmerener, ajisüaka MGNREGA sen shitak angutsü teimla ka lir, ibaji Nagaland angh-i dena iba  maparen indang ya kanga süoki ia bilemer. Ibayongji pai sorkar dang iba maparen ya bushisüngdangtsü atema Lokayukta (Anti-Corruption Ombudsman) mesüra Anti-Corruption Commission nem agütsütsüla ta shiogo. Ajisüaka, state nung tang tashi Lokayukta meshim aser State Vigilance Commission dak tashi mali, anungji iba ochimashi mapa ya  Rtd High Court Judge kati tekolak ser “Impartial Inquiry Commission” kati bushisüngdangtsüla ta Congress lenirisa metetdaktsü.
” RD minister-i nübortem atema yokba MGNREGA sen nungi ‘Mobilisation fund’ tenüng nung sen memeshi süra shitakba pai VDBs aser par officer-tem dang nungi senji memeshi ta metetdaktsütsüla aser VCC/VDBs nem blank cheque nung sign mesüdaktsütsüla aser sen agizüka alibaji Job card alirtem nem VDB ajanga  meyipa  agütsütsüla,” ta K.Therieisa metetdaktsü.
NPF government yabo kecha nükjisong makaba sorkar, parnok ya lokti tentet aser linük tenzükertem nem anishidaktsüba telok ka dang lir. Parnok nükjidongji ochimashi mapa inyaktsü bilemba dak alaka tanga kecha mali. Election mapang parnoki election manifesto yanglur saka election temerbo NPF purtem shingaia election manifesto indang mejembir.Ibai nübortem ashioktsütsü renemba kaket ka dang lir ta K.Therieh-isa metetdaktsü.
NPF teloki bilemba lenmang ka dang lir, ibaji taruba election nunga sen agi vote alitsü aser iba senjia parnok meyong masü saka nübortem  meyong sen bendena ayuba asütsü. NPF lenirtemi inyakba mapa ajunga agi parnoki nübortem meyong sen auyadena yur, iba jagi ali alia kiojen aser hotel yanglur aser tanüngba agi election mapang nung vote alir. Aji oda, nisung kari election nung sen yong vote yokra, ibajibo pei sen yong pei vote ayoker asütsü. Ibaji temenen sen aser iba jagi kibong dangi atakatemang jaoktsü ta Nagaland Congress tirisa metetdaktsü.

You must be logged in to post a comment Login