Congress teloki Modi government aitsür

New Delhi, September 25 (Agencies) : Jammu & Kashimir kübok Uri nung kiralongrartemi amakba mapa nung center sorkari kecha meshitetba atema Congressteloki Narendra Modi-i aniba government yasa tashimeitiba, kechiyong iba government yagi Pakistan dang kechi ashitsüa memetet ta Congress teloki aitsüogo.
” Linük kümzüka ayutsü inykaba maparen nung tang aliba government yasa tashimeitiba government asütsü ,” ta Congress tenüng nung jembir Manish Tiwari-i metetdaktsü.
” Iba government yagi aibelenpet aibelener aser linük kümzüktsü atema item aibelen putettsütsübaji opposition mapa lir,” ta paisa ashi.
Nisung kari danga Bharatiya Janata Party (BJP) government aija jembira, ibajibo linük anemer amai aitsür ta Congress telokisa aitsü.
Congress telokisa  Rafale fighter jet jenjang sen Rs 725 crore nungi Rs 1,600 crore tashi atuba indang kuli meshia metetdaktsü.
United Progressive Alliance government mapang French Rafale jet-ji sen Rs 725 crore agi alitsü lateta yutsü, saka ibaji endoker tang Modi-i aniba government-i kasaji sen  Rs 1,600 crore agi alitsü lemtet ta Congress telokisa aija metetdaktsü.