Congress teloki Naga yimten tenzüker ajak chiokdaktsüner

Kohima, Oct 1 (TYO) : Naga yimten nüjiso asoshi inyaketem shirnoksa tepuokdak balala nung puoka lir, parnok ajakji chioktsüla ta All India Congress Committee (AICC) nung züngsem aser taoba NPCC tir Wb.K.V.Pusai metetdaktsüogo.
Naga nunger linük tenzüker puoka aliba chiokba ajanga tang Naga yimten tebilemtsü ken o latettsü asoshi inyaktepa aliba maparen nung teyari angutsü ta paisa ashi.
Naga nunger yimten nüchiso bushirtem puoka aliba chioktsü asoshi akangba ya Nagaland nung tenteta aliba yimten teloktem rongnung Congress telok mezüng asütsü.
Naga yimten ken o latettsü asoshi India sorkar o NSCN-IM na tsüngda yimjung ken o ka August 3, 2015 nü renembaji nübortem nem metetdaktsütsüla, iba jagi dang ano tanga tanüngba Naga nunger yimten tenzüker teloktema shilem agidaktsütettsü ta Pusaisa metetdaktsü.
Yimten nung inyakertem tepuokdak yua aliba nungi chiokba ajanga kati ka dak tenmulung lemtep adoktsü aser iba jagi yimjung nung alitsü atema ken o jembiba nung teyari tuluka angutsü ta Congress lenirisa ashi.
NSCN-K telok küm pongo asoshi center sorkari nokdangba jagi Naga yimten tebilemtsü ken tatembang küma latettsü merangba maparen nung timtem alutsü ta paisa metetdaktsü. ” Center sorkari yimjung atema inyaker süra tang ama mapang nung ya Naga nunger linük tenzüker telok shinga menokdangtsüla, kechiyong iba jagi tang yimjung ken o jembia aliba ya raksatsü ,” ta Pusaisa metetdaktsü.
Paisa center nung BJP teloki aniba sorkari temulung ana ser Naga yimten tebilemtsü akoktsü merangba mapa aitsü. NSCN-K telok anema center sorkari telemtetba agiba aija Naga nunger mulungtet teloktemia metetdaktsüogo.