Congress teloki Quit India Movement Jubilee among

Dimapur, August 08 (TYO) : India nungi British nungertem oadoktsü tayongzükba agütsüba sentong “Quit India Movement” tenzüker küm 75 ajungba Platinum Jubilee sentong ka Nagaland Pradesh Congress Committee-i ayongzüka Mongolbarnü Dimapur nunga Hotel Seb nung kaogo. Iba sentong nung tongti tejaokerji Arunachal Pradesh nung taoba mapang Chief minister, Nabam Tuki liasü.

Iba sentong lapokja, NPCC tir Wb.K.Therie-i jembidang, India nung aruagi British yimli amenoka yur, iba kübok India nungertem mezüngmeshia amshiba maremteti, 1885 küm India yimten nüchiso atema jembitsü asoshi Indian National Congress (INC) tenet aser ibaji senmang küma tanü tashi arudagi, ta metetdaktsü.

Aji oda, INC nung Mahatma Gandhii anir India nungi British nunger oadokang ta ayimtenba sentong ka “Quit India Movement” ya tenzük, ta paisa metetdaktsü.

Ajisüaka, Naga nungertembo India nüchiso asoshi raraba nung shilem magi, kechiyong iba mapang Naga nunger lenirtemi Naga nunger India kübok ali nung majungtsü ta asüba angatetadoker liasü, iba jagi British nunger India toktsür aodang, Naga nungertemi parnok India kübok masü saka sadem-sadema parnok kija tokjang, ta mepishia liasü.

Aji oda, Naga nunger nüchiso bushiba mapang nung Nagaland state ya ngutet aser iba ya Naga nunger Congress nung adener aser tamalen lenirtemi lendong timtem tizükteta bener aruba takok ka asütsü, ta K.Therieh-isa metetdaktsü.

“Congress teloki teti Naga yimten bushiba maparen ya tashiyim agi masü saka yimjung nung bushitsüla ta jembia aru aser kasa tangatetba nung Naga yimten tebilemtsü ya koka jembitsü merangtsü,” ta paisa ashi.

Nagaland nung NNO aliba mapang 1972 küm Pfutsero nung senden alidang, Naga yimten tebilemtsü akoktsü atema yimjung nung temzüngi melaba ama bushitsü ta lateta lir, ta paisa metetdaktsü.

BJP telok anema jembidang, RSS aser BJP teloki linük ka aser tamangba yimsü ka, saru ka aser oshi ka ta India lima ya Hindutva lima kümdaktsüner. Parnoki shinga dena merarar saka Khristan-tem anema rarar aser reshikangshir ta paisa ashi.

Nagaland nung yimsüsürtem BJP aser RSS temoatsü agia küm pongo nung Chief minister pezüben tashi melena yimten yimsüsürtem pei telok toktsür senzüba mapatem ajanga Nagaland nem maksü bener arutsüogo ta NPCC tirisa metetdaktsü.

Kasa sentong nung jembidang, tanübo India nung Modii aniba BJP government anema jembirtembo amokmerena tsübudaktsür ta Nabam Tukii metetdaktsü. BJP government-i sen melenba aser GST latetba yagi sensakertembo kanga timtemdagi aser parnok aika mapa maka kümdagi ta Nabam Tuki-isa metetdaktsü.

Nagaland nung NPF teloki inyakba yabo yimten tashi aser sen raktepba mapa ka dang lir saka Congress teloki dang nübortem asoshi tagitsü inyaktsütettsü ta paisa metetdaktsü.

Iba sentong nung tarur pelaa agizüka NPCC nung Working president, P.Ayang Aonok-i jembi aser shilem agirtem ajak dang pelaba o NPCC nung tongti zülur, Jonathan Ao-i metetdaktsü. Iba sentong nung menden NPCC nung Media Cell mendenbuba Capt. G.K. Zhimomi liasü.