Congress ya kibong kati dang yimsü asüba party lir: PM Modi

Dharampu (Gujarat), December 04 (Agencies): Congress maneni aija tanü Ato kilonser, Narendra Modi-i, Congress party ya kibong kati dang yimsü asütsü akokba party ka lir, ta aitsü.
Modi-isa, Congress-i Gujarat sempar, anungji Gujarat nüburtemi Congress nem temerenshi agütsütsüla, ta ashi.
Assembly election agitsü aliba state, Gujarat kübok Malanpada, Dharampur nung lokti senden ka nung jembidang Modi-i, “Küm 50 tashi Congress-i Uttar Pradesh yimsü süogo, asenoki parnok mezüngmeshia aru asü? tanga states mezüngmeshi asü? Ajisüaka Congress lenir ajaki Gujarat atakatemer. Asenok dak kechi tai ali? Parnoki Sardar Patel-a atakatem. Pa dak kechi tai liasü?” ta asüngdang.
Modi-isa, “Indira Gandhi-i asen lenir Morarji Desai ita aika tepoukdak ayu. Kechiba Gujarat anema yamai inyaker? Parnoki Gujarat mezüngmeshiba atema Gujarat-i parnok dang tansütsü ka sayutsüla. Gujarat ya kodanga tangar taochi nung lia maru,” ta ashi.
Congress Tir election dak sendakba nung Ato kilonseri, “Congress-i joko maaksü ajak aremer. Court-i tai tonglokja aliba nisung (Rahul), shiba tang bail nung lir, item ama nisung nem district Tir menden-a magütsütsüla, ajisüaka pa nem party Tir menden agütsüogo. Congress nung koba sobaliba ali,” ta aitsü.
Modi-isa, “Iba ya kibong kati dang yimsüsüba yimli ka lir. Ni atemabo nüburtemi melungba ama ni inyaker. Terenlok nung ajemdaker onoki vote bushir aser meshir,” ta ashi.
Tawa Uttar Pradesh nung local body election dak sendakba nung Modi-i, “Tangbo UP nüburtemi Congress-i parnok sendoker ta metetogo. 2019 küm election nung Modi anema meinyaktettsü, ta tangbo Congress-i metetogo, joko parnok taolen mali, ibayongji parnoki Gujarat aso-a kümdaktsütsü meranger,” ta ashi.
Congress-i Other Backward Castes (OBC), Scheduled Caste (SC) aser Scheduled Tribes (ST) atema kecha meinyaktsür, ta shia Modi-i, “Tamalen sorkartemi item nübur atema kecha meinyaktsü. Ozü sorkar amenokba sülen onoki OBC commission nem linük temzüng nung maongka agütsü. Congress-i Rajya Sabha nung iba bill ji nokdang,” ta ashi.