Congress ya tzü telungi aiba rong ka lir: Rajnath

June 18 (Agencies): Tanü BJP lenir aser Union Home Minister, Rajnath Singh-i, Congress Party ya tzü telungi aiba rong ka lir, iba ama rong yabo ajaki toktsüner, kechiyong iba nungji tarutsü teimla mali, ta ashi.
NDA sorkar küm ana ajungba sentong ‘Vikas Parv’ nung jembidang Singh-i, taoba mapang Chhattisgarh Chief Minister, Ajit Jogi-i ‘Congress’ ta ajaba rong nung tapok ka patsü, aser tang iba rongji tzü telungi idar, ta ashi.
“Congress ta ajaba rong nung Ajit Jogi-i tapok ka patsü. Kodang rong nung tapok ka lidir, alima nung kecha tashi agia ibaji mekümzükteter. Anungji tangbo Congress ya tzü telungi aiba rong ka lir, iba nungji tarutsü teimla mali,” ta Singh-i ashi.
Home Minister-isa, kodang rong ka tzü telungi idir, anüng ozütemia rongji toktsüner, aser nisung aikati rongji toktsütsübaji tejangja, ta ashi.
Modi sorkar yimsüsüba küm ana nung ochimashi ken o maliasü, ta paisa ashi.
“Congress yimsüsüba mapang nung ajaklen ochimashi liasü. Minister tema karbo ochimashi ken o nung tepoukdak ayu. Tangbo shingaia ozü sorkar nung ochimashi liasü ta meshitetsü,” ta paisa ashi.
Tanü iba sentong nung Chhattisgarh Chief Minister, Raman Singh aser Minister of State for Defence, Rao Indrajit Singh nati jembia liasü.