Conrad Sangma-i Citizenship Bill atema tangatetba melenshir

Meghalaya Chief Minister Conrad K Sangma-i  Guwahati nung National People’s Party (NPP) indang office lapoktsüdang agiba noksa angur. (Guwahati, March 6)

Guwahati, March 6 (Agencies): Citizenship (Amendment) Bill 2016 anema noktakba nungi asetshir ama Meghalaya chief minister Conrad Sangma-i tanü Bill agizüktsü renema lir ta ashi.
Northeast kübok state ajak den asüngdangtepra ozü party-i Bill agizüktsü renema lir, ta Conrad-i ashi,
“Tang renema aliba Citizenship (Amendment) Bill 2016 ya onoki magizüker. Saka iba ya ajaki mulungtsüsa yanglutsü lenmang lir ama bilemer. Ajisüaka, iba Bill dak sendaktepa alir ajak den asüngdangyatsüla” ta tanü pai sentong ka nung jembidang ashi.
National Peoples’ Party’s (NPP) Assam office lapoktsü atema Conrad-i Guwahati semdang. Iba sentong ya National Peoples’ Party (NPP)-i aniba Meghalaya Peoples’ Alliance (MPA) sorkar küm ka ajungba den külemi agi.
“Ozü sorkari BJP-i aniba National Democratic Alliance (NDA) den yariteper. Sorkar ketdangsübaren nung onok tesentaktep junga lir. Onoki NDA den yariteper saka Northeast dak sendakba onük asoshibo onoki telemtetba agitsü. Mapangi yamaji inyaktsüsa bentsür arura Northeast nunger atema onoki noktaktsü” ta Conrad-i ashi.
Delhi-i Northeast nung alirtem ola mangashir aser Delhi nung angashidaktsütsü atema Northeast nunger longjemtsüla, ta paisa shisem.
“Centre sorkari Citizenship (Amendment) Bill 2016 bener arunü. Asenok kija ser anema noktakdang aser ola adokdang kecha mesütet, saka nisung, telok aser political party ajak longjemer Bill anema noktakdang arakzü” ta Conrad-isa metetdaktsü.
“Asür PA Sangma-i New Delhi nung asenok ola angashidaktsütsü atema northeast nunger ajak longjemtsüla ta ayongzüka aru. NPP ya asür PA Sangma-i agiba mera ka lir aser ni iba mapaji inyakerba dang” ta Meghalaya chief minister-isa shisem.