Conrad Sangma-i Kiren Rijiju den ajurutep

Shillong, Monupii (May) 14 (Agencies): Amungnü (Deobar) Meghalaya Chief Minister Conrad K Sangma-i New Delhi nung Union Minister of State for Home Affairs, Kiren Rijiju den ajurutep.
Centre-i Meghalaya nungi Armed Forces (Special Powers) Act [AFSPA] agienba atema Conrad-i Rijiju dang pelaba metetdaktsü.
Conrad-isa Rijiju dang Meghalaya nung tensa osang metetdaktsüdang, Centre-i yangluba Act kar benoka Meghalaya nung nakmati atutsü temelaba agüjang ta ashi.
Rongchii (April) 17, 2014 nungi National Green Tribunal-i Meghalaya nung nakmati atuba noktanga lir. Nakmati atudang tim masüba maparen ajanga ayongtem aser temeket menentsür ta shia parnoki tenokdangba agütsü.
Rongchii (April) 23, 2018 nü Union Home Ministry-i Meghalya nungi Armed Forces Special Powers Act (AFSPA) agiena liasü.
Yaküm Mongputeni (September) tashi Meghalaya kübok shilem tulu ka AFSPA kübok liasü. Ajisüaka, state sorkar den asüngdangya asüba sülen Act agien, ta MHA sangdong ka nung metetdaktsü.
2017 tashi Arunachal nunga police station 16 kübok AFSPA liasü saka tangbo police station 8 nung dang lir.
Home Ministry-isa northeast nung telungpurtem atema surrender-cum-rehabilitation policy kübok teyari agütsüba ajungketogo. Taoba mapang telungpur shia nem sen lakh 1 agütsü saka tang lakh 5 kümtsüogo, ta ashi.
Centre-isa Manipur, Mizoram aser Nagaland nung tourist atema restricted area permit aser protected area permit talenba salatsü.
Ajisüaka, Pakistan, Afghanistan aser China dena “countries of concern” atemabo talenbatem alitsü ta MHA-isa metetdaktsü.